Caasimadda Galmudug ee Dhuusamareeb, maanta waxaa lagu wadaa in uu ka dhaco shir u dhexeeyay madaxda dowlad goboleedyada, wufuud kala duwan ayaa magaalada ku qul quleysa tan iyo shalay.
Dhuusamareeb hadda waxaa ku sugan madaxweynaha Hirshabeele, Maxamed Cabdi Waare, iyadoo maanta la filayo in ay halkaas tagaan madaxweyniyaasha Puntland Saciid Cabdulaahi Deni, Koofur Galbeed C/casiis Xasan Maxamed Lafta gareen iyo Jubaland Axmed Maxamed Islaam (Axmed Madoobe).
Ammaanka magaalada ayaa si weyn loo adkeeyay, iyadoo lagu jiro gaba gaabadii u dambeysay ee ku aadan qabsoomida shirka madaxda dowlad goboleedyada dalka.
Waa shirkii ugu horeeyay oo madaxweyne Axmed Cabdi Kaariye Qoor Qoor uu ku marti geliyo madaxweyniyaasha dowlad goboleedyada, iyadoo arrimaha shirkan lagu gorfeyn doono ay kamid tahay doorashada dalka iyo qodobo kale.
Wixii shirka Dhuusamareeb ka soo kordha halkan ayaad kala socod doonaan Insha’alah.
