Shirka Madasha iskaashiga Wasaaradaha kaabayaasha Dhaqaalaha ee Dowladda Federaalka Soomaaliya ayaa maanta oo ah 18 March 2021 lagu qabtay magaalada Muqdisho.
Shirkan oo ahaa mid heer Wasiir ah ayaa waxaa shir guddoominayay Wasiirka Wasaaradda Hawlaha Guud, Dib u dhiska iyo Guriyeynta Xukuumadda Federaalka Soomaaliya Mudane Maxamed Aadan Macalin (Soomaali) waxaana ka qayb galay Wasiiro ka socday Wasaaradaha ku midaysan Madasha Wasaaradaha Kaabayaasha Dhaqaalaha Dowladda Federaalka Soomaaliya ee kala ah Wasaaradda Hawlaha Guud, Wasaaradda Maaliyadda, Wasaaradda Qorshaynta, Wasaaradda Duulista Hawada, Wasaaradda Boostada, Wasaaradda Dekedaha, Wasaaradda Tamarta iyo Khayraadka Biyaha iyo Xafiiska Bay’ada ee Xafiiska Ra’isal Wasaaraha.
Ujeedka shirka oo ahaa:
1- Isla fahmidda masraxyada/Fagaaraha wadatashi ee jira.
2- Fahmidda mashaariicda socota iyo kuwa jidka kusoo jira.
3- Isla qaadasho qaababka wadashaqeynta iyo sidii la iskaga gaashaan-buureysan lahaa. (marka la eego hey’adaha caalamiga ah ee aan la shaqeyneyno).
4- Hagidda qubaradeena ee ku aadan qaabkii ay u wadashaqeyn lahaayeen gaar ahaan mashaariicda ay tahay inaan ka wadashaqeyno.
Shirku intii uu socday waxaa lagu soo bandhigay Mashaariicda kaabayaasha dhaqaalaha ee Dalka ka socda, kuwa la qorsheeyey iyo Mashaariic kale oo hadda la doonayo in la hirgaliyo.
Sidoo kalane Wasiirada ayaa shirka ka jeediyey doorka Wasaaradiisu ay ku leedahay hirgelinta Mashaariicda kaabayaasha Dhaqaalaha.
Intii uu shirku socday waxa ay Wasiiradii kasoo qeybgalay ay isla garteen in:
– In la joogteeyo shirarka noocaan ah 6 bilba mar.
– In Wasaarad waliba ay markeeda martigaliso si wada shaqeyntu u hagaagto, lana wada jaanqaado.
– In shirka dambe mashaariic qaas ah lagu gorfeeyo.
– In mashaariicda diiwaangalin loo sameeyo.
– In hay’adaha la siinayo mashaariicda la fiiriyo diiwaankooda hore lana hubiyo inta aan la siin.
Gaba gabadii Wasiirka Wasaaradda Hawlaha Guud, Dib u dhiska iyo Guriyeynta Soomaaliya Mudane Maxamed Aadan Macalin (Soomaali) ayaa sheegay in meel looga soo wada jeesan doono horumarinta kaabayaasha dhaqaalaha Dalka, sidoo kalena la isku fahmay dhammaan mashaariicda kaabayaasha dhaqaalaha ahaa Wasaarad kastana ay qaadato doorkeeda ku aadan.
