Shirka Wadatashiga Wasaaradda Waxbarashada Soomaaliya iyo Wasaaradaha Waxbarashada dawladaha xubnaha ka ah dawladda Federaalka ah iyo Agaasinka Waxbarashada Gobalka Banaadir oo ka socda magaalada Garowe ee Caasimadda Puntland ayaa maalintiisii labaad galay.
Shirkan ayaa diiradda lagu saarayaa sidii la isaga kaashan lahaa horumarinta iyo tayeynta Waxbarashada dalka, isla markaasna loo xoojin lahaa xiriirka iskaashi ee ka dhaxeeya Hey’adaha Waxbarshadda dalka.
Kulankan ayaa waxaa si gaar ah loogu falanqeeyay yagleelidda Golayaasha Horumarinta Manhajka iyo Imtixaanaadka iyo madasha iskaashiga Wasaaradaha Waxbarashada Dawladda Federaalka, Dawlad goboleedyada iyo Gobolka Banaadir.
Kulankan oo uu shalay si rasmi ah u furay Wasiirka Wasaaradda Waxbarashada, Hidaha iyo Tacliinta Sare Mudane Cabdullahi Abuukar Xaaji, Cabdullahi Carab ayaa hoosta ka xarriiqay baahida loo qabo in dalku yeesho Manhaj mideysan oo tayo leh, si ubadka Soomaaliyeed u helaan Waxbarasho tayo leh.
Shirka oo ay soo qaban qaabisay Wasaaradda Waxbarashada Soomaaliya, ayna martigelineyso Wasaaradda Waxbarashada ee Puntland ayaa la filayaa in laga soo saaro Warmurtiyeed ku saabsan horumarinta iyo tayeynta Waxbarashada.
