Shirkii Madasha Wada tashiga Qaran ee looga hadlayay hanaanka doorashooyinka sanadka 2016, ayaa goor daweyd lagu soo gebagebeeyay Muqdisho,
Shirkan oo ay ka soo qeyb galeen Madaxda dowladda Federaalka, Madaxda Maamul goboleedyada, Wasiirro ka tirsan Xukuumadda, Xildhibaano, Wasiirro, xildhibaann0, qeybaha bulshada iyo wakiillo ka socday Beesha Caalamka.
Wasiirka Arrimaha Gudaha iyo Federaalka C/raxmaan Maxamed Xuseen Odawaa ayaa akhriyay war murtiyeed ka soo baxay shirka wada tashiga, kaasoo ka koobnaa illaa 10 qodob oo ay ugu muhiimsan yihiin hanaanka loo marayo geeddi socodka doorashooyinka 2016-ka.
Ergada Madasha wada tashiga qaran ayaa waxay isku raaceen hab raaca howl fulineed oo tilmaamaya hanaanka uu wada tashiga u dhacayo iyo soo jeedimaha kala duwan ee doorashooyinka ku dhici karaan sanadka 2016.
Ergada waxay isku raaceen maadaama duruufta haatan lagu jiro aysan saamaxeyn doorasho hal qof iyo hal cod, balse la qaban karo doorasho kale oo aan aheyn hal qof iyo hal cod.
Sidoo kale Ergada ayaa isku raacday in loo baahan yahay in wada tashi dheeri ah oo qeybaha kala duwan ee bulshada lala yeesho sida dhalinyarada, haweenka, odayaasha dhaqanka, culimada, aqoonyahanada, ganacsatada iyo dadka laga tirada badan yahay.
Kulamadaasi wada tashiga ayaa la isku raacay inay ka dhacaan deegaannada maamul goboleedyada, waxaana la soo jeediyay inay ka qeyb galaan qeybaha bulshada.
Wada tashiyada ayaa la tilmaamay iney qeyb ka noqdaan qurba-joogta Soomaaliyeed, si loo xaqiijiyo afkaarta bushada Soomaaliyeed.
Wajiga labaad ee kulankan ayaa la qaban doonaa todobaadka labaad ee bisha December, iyadoo lagu soo bandhigi doono talooyinka laga soo uruuriyay bulshada ku nool gobolada dalka, si loo qaato qaabka ugu wanaagsan ee doorashooyinka sanadka 2016 u dhacayaan.
War-murtiyeedka shirka waan idiin soo gudbin doonnaa
