NAFIS 2026 waa madal qaran oo diiradda lagu saarayo maalgashiga beeraha, wax-soo-saarka cuntada iyo xoojinta amniga cuntada Soomaaliya. Shirku wuxuu isu keenayaa dowladda, ganacsatada,maalgashadayaasha iyo dhinacyada ku shaqada leh horumarinta beeraha.
Shirweynaha waxaa lagu soo bandhigayaa fursadaha maalgashi ee ka jira waaxda beeraha iyo cuntada Soomaaliya, iyadoo la doonayo in la dhiirrigeliyo maalgashi gudaha iyo dibadda ah, lana kobciyo wax-soo-saarka beeraha.
Arrintan ayaa muhiimad gaar ah u leh Soomaaliya, maadaama dowladda ay horey u xoojisay qorshayaasha lagu horumarinayo amni-cunto, taageerada beeralayda, wax-soo-saarka gudaha iyo beeraha u adkeysan kara isbeddelka cimilada.
Ujeeddada ugu weyn ayaa ah in la abuuro iskaashi u dhexeeya dowladda iyo ganacsatada, lana helo maalgelin horseedi karta koboc ku yimaada wax-soo-saarka cuntada, shaqo-abuurka iyo dhaqaalaha dalka.
