Guddoomiyaha golaha sare ee Jaamacadda SIMAD Dr. Cabdiraxmaan Al-Muxeylaan, ayaa maanta xarigga ka jaray dhismo cusub oo loo dhisay kuliyadda Injineeriyadda oo lagu soo kordhinayo Jaamacadda, tallaabadan ayaa qeyb ka ah horumarinta jaamacadda SIMAD.
Shir jaraa’id oo uu Dr. Muxeylaan ku qabtay xarunta jaamacadda ee waddada Warshadaha, ayuu ku sheegay in tallaabadani ay qeyb ka tahay mashaariic ay ku horumarinayaan adeegyada bulshada Soomaaliyeed.
“Haduu Alle idmo, waxaan sameyn doonnaa mashaariic kale oo ay ka faa’iideysan doonaan shacabka Somalaiyeed” ayuu yiri Dr. Cabdiraxmaan oo intaa ku daray “Halkan waxaa ka muuqda dhul cusub, waxaan ku rajo weynahay inaan u dhisno Jaamacadda SIMAD isbitaal aan ugu talo galnay shacabka deggan magaaladani, waxaan soo jirnay ku dhawaad 30-sano, wanaa sii shaqeyn doonnaa inta uu Alle noogu talo galay”.
Wakaaladda Muslimiinta Afrika ayaa maamusha jaamacaddan oo la aasaasay sanadkii 1999-kii oo lagu billaabay machad xisaabaadka iyo maamulka lagu barto.
Agaasimaha Wakaaladda Muslimiinta Afrika, Sheekh Xasan Badawi oo ka hadlay furitaanka dhisman lagu soo kordhiyay jaamacadda ayaa yiri “Jimciyaddu waxay waligeed garab taagan tahay shacabka Somaaliyeed dhamaan qeybihiisa liita, jaamacadani shacabka Somaaliyeed waxay ugu adeegtaa tayo sarreysa iyo qarash aad u yar”.
“Shacabka Soomaaliyeed waxaan rabanaa inay u aqoonsadaan Jaamacadda SIMAD iyo mu’asasaadka kale ee Jamciyaddu leedahay inay yihiin hanti ay iyaga leeyihiin, inay ilaashadaan, in ay u arkaan wax Ilaahey uu u soo dhiibay walaaleheena hadda garabkeena taagan iyo inta kale ee ka dambeysa ama howsha la wadda”
Dhismaha cusub ee loo dhisay kulliyadda Injineeriyada ayaa ka kooban 3 dabaq oo leh qalabkii wax lagu baran lahaa sida Lap ay ardayda loogu talo galay. Sanadkii hore ayaa dabaq kan oo kale ah loo dhisay kulliyadda caafimaadka oo iminka shaqeysa, halka dhawaan la hirgelin doono Isbitaal weyn oo ay bulshadu ka faa’iideystaan.
