Tartanka Cayaaraha Orodka ee loo yaqaano Midnight Sun Marathon oo ay sanad kasta marti geliso Magaalada Tromsø ee Waqooyiga Dalkan Norway ayaa waxaa sanadkaan furay Boqorka Boqortooyada Norway Harald oo ay wehliso Boqoradda Mrs.Sonja waxaana goobjoog ka ahaa munaasabadda furitaanka ciyaarahan Duqa Magaalada Tromsø Mr.Jarle ,masuuliyiin ka tirsan Maamulka Gobolka iyo dadweyne aad ufara badan.
Tartanka oo ka bilowday Xarunta fagaaraha weyn ee magaalada ayaa waxa ka qeybgalayay 74 dal oo ku yaalla Koofurta Ameerika, Europe, Asia, Australia iyo Afrika oo ay Soomaaliya qeyb ka tahay, waxaana la ordayay fogaan dhan 21KM
Cabdi Macallim Maxamuud waa muwaadin Soomaaliyeed oo ku nool Magaalada Tromsø ee Dalka Norwey waxa uuna ka qeybgalay Tartanka Cayaaraha Orodka Midnight Sun marathon, isagoo ordayay 10KM muddo 45Daqiiqo ah.
Cabdi ayaa sheegay inuu aad ugu faraxsanyahay in sanadkaan uu markii ugu horreysay cayaar nuucaan oo kale ah uga qeybgalo dalka Norway, waxa uunaq abanqaabiyeyaasha cayaartan uga mahadceliyey biladda iyo abaalmarinta ay guddoonsiiyeen, isagoo intaasi ku daray in Soomaaliya ay gashay kaalinta 7aad ee tartanka waxaana kaalinta ugu horreeya ee tartanka ku guuleysatay haweeney u tartameysay dalka Kenya.
Saalax Xasan Axmed waa muwaadin Soomaaliyeed oo ku nool Magaalada Baardufoss ee dalka Norwey waxa uuna ka qeybgalay tartankaas isagoo tilmaamay in ay muujiyeen doorkooda ah in Soomaaliya ay ka dhexmuuqato ciyaaraha iyo tartamada ceynkaan ah ee lagu qabanayo wadamada caalamka.
Tartankaan caalamiga ah ayaa la qabtaa sanad kasta bisha juun waxaana lagu qabtaa magaalada Tromsø oo xilligaan xagaaga ah aysan marnaba cadceeddu ka dhicin habeen barkii, waana magaalo aad u qurux badan oo ay ku xeeranyihiin buuro,Webiyo,Jasiirado,iyo Dhuumo ay isticmaalaan gaadiidka waxa ayna magaaladani tahay magaalada ugu weyn woqooyiga wadanka Norway oo marti gelisa dalxiiseyaal farabadan oo ka kala yimid daafaha dunida.
W/D: Maxamed Cabdulqaadir Daahir (MCD)
