Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta xarunta madaxtooyada ku qaabilay Ku-Xigeenka Wakiilka Xoghayaha Guud ee Qaramada Midoobay , ahna Isku-Duwaha Hawlaha Gargaarka Aadaminimo ee Soomaaliya, Peter De Clecq.
Madaxweynaha iyo Mr De Clecq ayaa kulankooda kaga wadahadley Shirka Caalamiga ee Arrimaha Gargaarka Aadminimada Dunida oo toddobaadka dambe ka dhacaya magaalada Istanbul ee dalka Turkiga.
Soomaaliya oo ka mid ah waddamada shirkaasi ka qeybgalaya ayaa waxay ku soo bandhigi doonta sida ay u socdaan hawlaha gargaarka, iyo sida loo tayeyn karo gargaarka loo fidiyo Soomaaliya si ay saameyn waxtar leh ugu yeelato shacabka.
Shirweynaha ka dhacaya Istanbul ayaa waxaa lagu barbar qaban doonaan kulan gaar ah oo lagu eegayo xaaladda aadminimo iyo samafalka Soomaaliya.
Waxaa kale oo kulanka Madaxweynaha iyo Ku-Xigeenka Wakiilka Xoghayaha Guud ee Qaramada Midoobay , ahna Isku-Duwaha Hawlaha Gargaarka Aadaminimo ee Soomaaliya, lagu soo hadal qaadey qaxootiga Soomaalida ee dalalka dunida ku baahsan, dhibaatooyinka tahriibka iyo sidii fursado dhaqaale iyo shaqo loogu abuuri lahaa dhalinyarada iyo dadka barakaceyaasha.
