17- Aug Taliska Ciidanka XDS ayaa fashiliyay weerrar ay maleeshiyaadka Khawaarijtu kusoo qaadeen magaalada Baydhabo, oo ah Caasimadda KG ah ee Maamul Goboleedka Koonfur Galbeed Soomaaliya.
Maleeshiyaadka Khawaarijta ayaa muddooyinkii dambe waday isku dayo ay ku doonayaan inay qalqal geliyaan amniga iyo xasilloonida magaalada Baydhabo, xilli magaalada iyo guud ahaan deegaannada Koonfur Galbeed ay sameynayaan horumarro muuqda oo dhinaca amniga ah.
Ciidanka XDS oo si buuxda uga foojigan dhagaraha iyo isku dayada cadowga ayaa si adag uga hortagay weerarka, waxaana Khawaarijta la gaarsiiyay jab xooggan oo isugu jira khasaare naf iyo maal ah. Maleeshiyaadkii weerarka soo qaaday ayaa lagu qasbay inay goobahii lagu dagaalamay kaga tagaan meydad, hub iyo gaadiid.
Taliska Ciidanka XDS ayaa faahfaahin dheeraad ah oo ku saabsan weerarka la fashiliyay iyo khasaaraha Khawaarijta soo bandhigi doono saacadaha soo socda.
Taliska Ciidanka XDS wuxuu shacabka Baydhabo iyo guud ahaan bulshada Soomaaliyeed ugu baaqayaa inay muujiyaan feejignaan iyo wada-shaqeyn, isla markaana ay garab istaagaan ciidamada Qaranka ee u taagan difaaca shacabka iyo sugidda amniga dalka.
