Saraakiisha Ciidanka Xoogga Dalka ayaa guddoomay Dareeskan Ciidan oo Dowladda Turkigu ay ugu talagashey Ciidamada Cirka iyo Badda oo ka mid ah Ciidanka Xooga Dalka Soomaaliyeed,waxaana ay ka guddoomeen saraakiil kale oo ka socotay Wasaaradda Gaashaandhiga Dalkaasi Turkiga.
Dareeskan Dowladda Turkigu ay ugu deeqday Ciidammada Cirka iyo Badda Soomaaliya ayaa isugu jiray dhar iyo kabaha buudka ah iyo agab kale oo labiska ciidammada laxiriira,kuwaasi oo qeyb ka ah dadaalada ay dowladda Turkigu ay ku taageerayso ciidanka Xoogga Dalka.
Munaasabad kooban oo dareeskaasi loogu wareejinayay Ciidanka Xoogga Dalka ayaa ka dhacay Xerada Tababarka Jasiira, waxaana Taliyaasha Ciidammada Cirka iyo Badda Admiral Madey Nuurow Sheekh Ufurow iyo Maxamuud Sheekh Cali deble Baylood ay balanqaadeen in ay u maareyn doonaan sidii loogu talagalay.
“Maanta waxaan halkani ku guddoomaynaa dareeskan oo Dowladda Turkigu inoogu deeqday,mana-ahan markii ugu horeysay,waa markii labaad oo deeq tan lamid ah ay noo keento Dowladda Turkiga, waxaan dhihi karnaa waa cusub ayaa inoo baryay, anagana waxaan balanqaadaynaa in aan u maareyno sidii loogu talagalay.” ayuu yiri taliyaha Ciidammada Cirka Maxamuud Sheekh Cali Deble Baylood.
Abaanduulaha Ciidanka Xoogga Dalka Soomaaliyeed Gen. C/llaahi Cali Caanood ayaa uga mahadceliyay Dowladda Turkiga sida ay u garab taagantahay Ciidanka Xoogga Dalka Soomaaliyeed, isagoo ku tilmaamay mid dhiiro-gelinaysa Ciidanka Xoogga Dalka.
Dowladda Turkiga oo kamid ah saaxiibada Soomaaliya ayaa door muuqda ku leh taageerada la siiyo dowladda iyo shacabka Soomaaliyeed, sida hirgelinta mashaariic horumarineed iyo taageeridda ciidammada Qalabka sida ee Soomaaliya.
