Taliyaha ciidanka booliiska Soomaaliya sareeyo gaas Cabdi Xasan Maxamed (Xijaar) ayaa maanta saraakiisha ciidanka kala hadlay in aysan ku milmin siyaasadda isla markaana waajibaadkooda u gutaan sida uu sharciga dhigayo.
Waxaa uu saraakiisha faray in ay ka shaqeeyaan sugida ammaanka doorashada iyo guud ahaan dalka.
“Anaga doorashada hagideeda iyo daadejinteeda ma ahan ee anaga waa amni, waxaa la rabaa saraakiisha I hor fadhisa in ay ciidanka ay mas’uulka ka yihiin ee dowlad goboleedyada iyo magaalada Muqdisho qeyb libaax ka qaataan sugida amniga doorashooyinka,” ayuu yiri taliyaha.
Waxaa uu intaas ku daray in ciidanka booliiska uusan ku milmin siyaasadda Meesha lagu hayana uusan faraha la gelin.
Taliyaha oo hadalkiisa sii wata ayaa tilmaamay in ciidanka ku amaanan yihiin in aysan jirin wax eed ah oo loo jeediyay oo ku saabsan arrimo nabad geliyo daro ah oo ay ka shaqeeyeen.
Sidoo kale, taliye Xijaar ayaa shacabka u sheegay in ciidanka diyaar u yihiin in ay ku howlgalaan dareenkooda isla markaana ciidanka booliiska looga baahan yahay in ay shacabka u turaan.
Hadalka taliyaha booliiska, ayaa imaanaya xilli shalay sidan oo kale taliyaha ciidanka xoogga dalka Soomaaliyeed sareeyo guuto Odawaa Yuusuf Raage amray in ciidanka xoogga uusan faraha la gelin siyaasadda.
