Taliye ku-xigeenka ciidanka Dhulka Jeneraal Cabdullaahi Aaden Xusein (Ciiro) ayaa xilka u kala wareejiyay Taliyihii hore ee Ciidamada Guutada 27-aad ee Abuu Dujaana Gaashaanle Nuurdiin Xuseen Macalin iyo Taliyaha cusub ee Guutada 27-aad ee Abuu Dujaana Gaashaanle Maxamed Nuur Maxamed Cabdi oo dhawaan uu Taliska Xoogga Dalku u soo magacaabay Guutadaan.
Xil wareejinta oo ay isla soo dubarideen Guddiga xil wareejinta oo uu hogaaminayay Gaashaanle sare Yoonis Maxamed Cali oo ahaa Guddoomiyaha guddiga xil wareejinta guutada Abuu Dujaana ee Ciidanka Xoogga Dalka ayaa Taliye xigeenka la wadaagay shaqadii ay soo qabteen iyo tiro koobka, ciidanka Guutada, Hubka iyo Gaadiidka, taas oo lagu soo aruurshay Galka xil wareejinta.
Taliye ku-xigeenka Ciidanka Dhulka Jeneraal Cabdullaahi Aaden Xusein Ciro oo xil wareejinta ka dib la dardaarmay Taliyaha cusub iyo Saraakiisha la shaqeynaysa ayaa sheegay in looga fadhiyo xoojinta Dagaalka lagula jiro kooxda Khawaarijta oo ay door weyn ku leeyihiin Ciidamada Guutada 27-aad ee Abuu Dujaana.
