Taliye ku-xigeenka ciidanka booliska Jeneraal Mukhtaar Xuseen Afrax ayaa maanta tababar u soo xiray in ka badan 40 hablo ah oo ka tirsan ciidanka booliska, kuwaasi oo la barayay ka hortagga xadgudubyada loo geysto haweenka.
Munaasabad kooban oo lagu qabtay dugsiga tababarka booliska Jeneraal Kaahiye ee degmada Xamar Jajab ayaa waxaa ka qeyb galay saraakiil ka tirsan booliska iyo kuwa AMISOM, waxaana goobta suugaan ku soo bandhigay kooxda fanaaniinta heegan ee ciidanka booliska.
Tababarkan oo socday muddo 15 cisho ah ayaa gabdhaha loo soo xirayay waxa ay xafladda ku soo bandhigeen ruwaayad ka turjumeyso waxyaabaha ay barteen iyo sida ay uga go’antahay inay u adeegaan bulshadooda oo ay ka hortagaan cidkasta oo dhibaateyneysa, gaar ahaan Haweenka.
Taliye ku-xigeenka ciidanka booliska Sareeyo Guuto Mukhtaar Xuseen Afrax oo tababarka soo xiray ayaa kula dardaarmay inay door muhiim ah ka qaataan ka hortagga xadgudubyada lagula kaco hooyada iyo dhallaanka.
Gabo gabadii gabadhihii ka qeyb galay tababarka ayaa waxaa la guddoonsiiyay shahaadooyin, kuwaasi oo looga fadhiyo in waxyaabaha ay tababarka ku qaateen ay ugu adeegaan bulshadooda.
