Tartan cilmiyeedka bisha Ramadaan oo galay sanadkii sagaalaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankiisa saddexaad oo ah wareegga koowaad ku tartamay tartameyaasha Degmooyinka Jilib Vs Xamarweyne oo ka kala tirsan Gobollada Jubbada Dhexe iyo Benaadir, waxaana barnaamijka sanadkii todobaad oo xiriir ah taabagelineya Maamulka Gobolka Benaadir.
Tartameyaasha labada degmo ee Jilib Vs Xamarweyne ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag.
Jilib
Tartamayaasha Degmada Jilib ee gobolka Jubbada Dhexe waxaa la weydiiyay todobo su’aal, waxa ay ka jawaabeen Afar su’aal, iyagoo iska qalday Saddex su’aal, waxa ay ka faa’iideysteen Labo su’aal oo soo hareermartay Xamarweyne, sidaasi darteed wadarta guud ee dhibcaha ay heleen tartameyaasha Degmada Jilib waxay noqotay labo iyo toban (12) dhibcood.
Xamarweyne
Tartameyaasha Degmada Xamarweyne ee gobolka Benaadir waxaa dhankooda la weydiiyey todobo Su’aal, waxa ay ka jawaabeen Afar su’aal, waxaana ay iska qaldeen Saddex su’aal, waxa ay ka faa’iideysteen Labo su’aal oo soo hareer martay tartamayaasha Degmada Jilib, sidaa darteed wadarta guud ee dhibcaha tartameyaasha Degmada Xamarweyne ay heleen waxay noqotay labo iyo toban (12) dhibcood.
Sida uu dhigayo sharciga tartanka marka ay labada degmo noqdaan isku dhibco, waxaa lagu daray su’aalo dheeri ah si loo kala saaro labada degmo ee tartamaya, waxaana tartamayaasha degmada Jilib ay ka jawaabeen su’asahii 8aad ee la weydiiyay, waxaana dhanka Xamarweyne ay iska qaldeen su’aashooda, balse nasiib wanaag waxaa ka faa’iideystay tartamayaasha Jilib, sidaas ayayna ku heleen 4 dhibcood oo ahayd su’aalihii dheeriga ahaa.
Tartamayaasha Degmada Jilib ee Gobolka Jubbada Dhexe ayaa caawa u soo gudbay wareegga labaad ee tartanka.
Habeen dambe haddii uu Alle idmo oo ah habeenka afaraad ee tartanka, waxaa foodda is dari doono, tartamaayasha degmooyinka Dharkeynley Vs Dhahar oo ka kala tirsan Gobollada Banaadir iyo Sanaag.
