Tartan cilmiyeedka bisha Ramadaan oo galay sanadkii saddex iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 23-aad ee wareegga Labaad ku tartamay Degmooyinka Xamar jajab iyo Aadan yabaal oo ka kala tirsan Gobollada Shabeelaha Dhexe iyo Banaadir, waxaana barnaamijka si wadajir ah u taaba-gelinaya Bankiga IBS iyo Maamulka Gobolka Banaadir.
Tartameyaasha labada degmo ee Xamar jajab iyo Aadan yabaal ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Xamar jajab
Tartameyaasha Degmada Xamar jajab ee Gobolka Banaadir waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Shan su’aal, halka ay iska qaldeen Labo su’aal ’aal, waxa ay ka faa’iideysteen Saddex su’aal oo soo hareermartay Tartamaayasha Aadan yabaal, sidaa darteed wadarta guud ee dhibcaha tartameyaasha Degmada Xamar jajab ay heleen waxay noqotay Lix iyo Toban (16) dhibcood.
Aadan yabaal
Tartamayaasha Degmada Aadan yabaal ee Gobolka Shabeelaha Dhexe waxaa dhankooda la weydiiyay todobo su’aal, waxa ay ka jawaabeen Saddex su’aal, iyagoo iska qalday Afar su’aal, ma jirin wax ka faa’iideysi ah oo ay heleen, sidaa darteed wadarta guud ee dhibcaha ay heleen tartameyaasha Degmada Aadan yabaal waxay noqotay Lix (06) dhibcood.
Hadaba kulankii 23-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga xiga u soo gudbay tartamayaasha Degmada Xamar jajab ee Gobolka Banaadir, ayadoo gebagebadii ay labada tartame isugu hambalyeeyeen guushaasi.
Barnaamijka sanadkan oo lagu soo kordhiyay su’aalo la weydiinayo dhageystayaasha iyo daawadayaasha ku taxan tartanka marka la gaaro qeybta dhextaalka ayaa caawa su’aashii dadweynaha la weydiiyay oo dul saarneyd 30$ waxaa ka jawaabay Cabdiqaadir Cali Macruuf oo jooga deegaanka Garasbaaley, kaasi oo ku guuleystay 30$ oo ay bixineyso Bankiga IBS.
Habeen dambe haddii uu Alle idmo oo ah habeenka 24-aad ee tartanka waxaa jiri doona labo tartan, qeybta hore waxaa ku tartami doona degmooyinka Dhahar iyo Dhuusamareeb oo ka kala tirsan Gobollada Sanaag iyo Galgaduud, halka qeybta 2-aad ay ku loolami doonaan degmooyinka Waaberi iyo Hodan oo ka wada tirsan Gobolka Banaadir
Sawir qaade: Khadar Cali Nuur
