Tartan cilmiyeedka bisha Ramadaan oo galay sanadkii kow iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 1-aad ku tartamay Degmooyinka Warta Nabadda Vs Xamar Jajab oo ka wada tirsan Gobolka Benaadir, waxaana barnaamijka sanadkii 2aad oo xiriir ah taabagelineya Bangiga IBS.
Cabdullaahi Muxudiin Codka oo ka mid ah daadihiyeyaasha Tartanka ayaa ugu horeyn sharaxaad kooban ka bixiyay sharuudaha looga baahanyahay tartamayaasha ka qeybgalaya tartan Cilmiyeedka Warbaahinta Qaranka, ayna ilaaliyaan sharuucda tartanka.
Tartameyaasha labada degmo ee Warta Nabadda Vs Xamar Jajab ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac.
Warta Nabadda
Tartameyaasha Degmada Warta Nabadda ee Gobolka Benaadir waxaa la weydiiyey todobo Su’aal, waxa ay ka jawaabeen Labo su’aal, waxaana ay iska qaldeen Shan su’aal, ma jirin wax ka faa’iideysi ah oo ay heleen, sidaa darteed wadarta guud ee dhibcaha tartameyaasha Degmada Warta Nabadda ay heleen waxay noqotay Afar (4) dhibcood, waxaana tartamayaasha Degmada Warta nabadda ay ahayd tartamayaashii sanadki tegay galay kaalinta 3aad ee tartanka, kuwaasi oo caawa ku haray wareegga 1aad.
Xamar Jajab
Tartamayaasha Degmada Xamar Jajab ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Saddex su’aal, iyagoo iska qalday Afar su’aal, Waxa ay ka faa’iideysteen Hal su’aal oo soo hareer martay Warta Nabadda, sidaasi darteed wadarta guud ee dhibcaha ay heleen tartameyaasha Degmada Xamar Jajab waxay noqotay Sideed (8) dhibcood.
Tartamayaasha Degmada Xamar Jajab ee Gobolka Benaadir ayaa caawa u soo gudubtay wareegga labaad ee tartanka.
Habeen dambe haddii uu Alle idmo oo ah habeenka 2-aad ee tartanka, waxaa foodda is dari doona degmooyinka Kismaayo oo ah guuleystayaasha sanadkii tegay ee tartanka iyo Shibis oo ka kala tirsan Gobollada Jubbada Hoose iyo Banaadir.
