Tartan isboorti oo lagu xoojiyay isdhexgalka bulshada iyo Nabadda ka jirta degmada Heliwaa ayaa shalay gelinkii dambe lagu qabtay degmada, kaasi oo dhexmaray labo koox oo ka kala socotay Waaxyaha Waxar-cadde iyo Bandar-wanaag, iyadoo ay u soo daawasho tageen dadweyne aad u fara badan.
Tartanka oo ah mid uu soo qaban qaabiyay Maamulka degmada Heliwaa ayaa dadweynihii u soo daawasho tegay waxa ay aad u jecleysteen qaab cayaareedkii ay soo bandhigeen labada koox eek u cayaareysay magaca labo waax oo ka tirsan Degmada, waxaana ay cayaartaasi ku soo idlaatay 2-0 oo ay guusha ku raacday cayaartoodka Bandar-wanaag.
Related posts
Liibaan Maxamed Cali oo ah tababaraha kooxda Waaxda Waxar-cadde ayaa sheegay in uu aad ugu faraxsanyahay cayaartii ay soo bandhigeen kooxdiisa, isagoo uga mahadceliyay dadaalka ay muujiyeen, waxaana uu kooxda kale ugu hambalyeeyay guusha ay gaareen.
Tababaraha kooxda Bandar-wanaag Mahad Abuukar Cali oo isna kulanka kaddib la hadlay Warbaahinta Qaranka ayaa sheegay in ay ku faraxsanyihiin guusha ay gaareen, waxaana uu intaa ku daray inay sii joogteyn doonaan sare u qaadidda tartamada Isboorti.
Guddoomiyaha Degmada Heliwaa Maxamed Axmed Xaashi ayaa ugu horeyn u hambalyeeyay labada koox cayaar wanaaga ay soo bandhigeen, waxaana uu kooxda tartanka badisay ku booriyay inay sii labo jibaaraan tayaynta xirfadooda, isagoo xusay in ujeedka tartanka uu ahaa isdhexgalka bulshada oo qeyb weyn ka qaadaneysa Nabadgelyada iyo horumarka.
Intaa kadib Guddoomiyaha degmada Heliwaa oo ay wehliyaan saraakiisha hayโadaha amniga ee degmada ayaa waxa ay kormeer ku soo sameeyeen xaafadaha kala duwan ee degmada, kaasi oo ay ugu kuurgalayeen xaaladda amni ee ka jirta degmada iyo xaaladaha kale ee ay ku suganyihiin shacabka halkaasi ku nool.
