Koob loogu magacdaray Nabadda iyo Isdhexgalka bulshada oo ay ku tartameen kooxaha kubadda cagta ee ka dhisan Degmada Xudur ayaa lasoo gabagabeeyey.
Cayaartaan kamadambeyska aheyd oo maanta lagu soo gabagabeeyey garoonka kubada cagta Dr. Waaberi waxa taabagelisey Jaaliyada Koonfur Galbeed Soomaaliya ee Waqooyiga Ameerika, waxana wada cayaaray Kooxaha kala ah ACF iyo BURIYAA mid walba bilowga cayaarta waxay ku haminaysay in koobka ay hanato.
Boqolaal dadweyne oo kala taageeraya labada kooxood ayaa soo buux dhaafiyey tarabuunka, cayaartu waxay aheyd mid aan lasaadaalin karin, xubno ka tirsan Maamulka Gobolka, kan Degmada iyo Guddiga cayaaraha ayaa goob joog ka ahaa oo cayaartu daawanayey, qeybta hore ee cayaarta waxa lagu kala nastay 2- 0 oo ku hogaaninaysay kooxda ACF.
Kooxda Buriyaa ayaa iska lumisey fursado badan waxana gabagabadii cayaarta ku soo idlaatay 4-1 oo ay guusha ku raacday kooxda ACF, intaa kaddib waxa labilaabay guddoonsiinta koobab iyo bilado shaksiyaad mutaystay iyo kooxdii guusha raacday.
Guddoomiyaha Isboortiga Degmada Xudur Maxamed Fiidow Maxamuud iyo Guddoomiye ku-xigeenka Maamulka iyo Maaliyadda ee Gobolka Bakool Cabdullaahi Maxamed Nuur ayaa Jaaliyadda uga mahadceliyey taabagelinta tartanka lagu xoojinayya isdhexgalka bulshada.
Tartankan isboorti ee lagu dar dargelinayay isdhexgalka bulshada ayaa ka turjumeysa dadaalka maamulka iyo ciidamada ay ku bixiyeen adkeynta Nabadgelyada Degmada Xudur iyo deegaannada ku teedsan.
W:D/ Maxamed Xasan Cabdiraxmaan (Bakool)
