Tartan cayaareedkaan lagu maamuusayay bilasha bisha Ramadan ee barakeysan oo ay soo abaabuleen xafiiska hidaha iyo tacliinta ee Safaaradda Soomaaliyeed ee Koonfur Afrika iyo Ururka dhallinyarada Qaranka Soomaaliyeed ayaa waxaa ka qeyb galay afar kooxood oo ka dhisan magaalada Pretoria.
Kulan cayaareedkaan oo ay kooxaha ka qeybgalaya wada cayaareen munaasabadii furitaanka aheyd ayaa waxaa ka hadlay qaar ka mid ah kabtanada iyo maamulayaasha kooxaha ka qeyb qaadanaya tartan ciyaareedka Ramadaanka inta uu socdo.
Guddoomiyaha Ururka Dhalinyarada Qaranka Soomaaliyeed ee Koonfur Afrika mudane Xarbi Cabdi Xasan kana mid ahaa maamulayaasha mid ka mid ah kooxaha ka qeyb qaadanaya tartan ciyaareedka Ramadanka ayaa sheegay inay ku faraxsan yihiin inuu ufurmo tartankan, uuna rajeenayo inuu guul ku dhamaado haddii alle yiraahdo, wuxuuna si gaar ah ugu mahadceliyay Safaaradda Soomaaliyeed oo iyadu gacan kasiisay inuu uqabsoomo koob ciyaareedkaan Ramadaanka.
Uqeybsamaha Xafiiska Hiddaha iyo Tacliinta Safaaradda Soomaaliyeed ee Koonfur Afrika mudane Cabdi Xalane Xirsi oo ka hadlay furitaanka tartan ciyaareedka Ramadaanka magaalada Pretoria ee caasimada dalka Koonfur Afrika ayaa sheegay inay cayaaruhu muhiim uyihiin dhalinyarada sidii ay isku fahmi lahaayeen, ka safaaradda ahaana ay garab taagan yihiin mar walba wax la qabashada da’yarta iyo jaaliyadda Soomaaliyeed ee Koonfur Afrika.
Tartan Ciyaareedkaan Kubadda Cagta ee lagu maamuusayo bisha Ramadan ee Barakeysan ayaa lagu wadaa inuu soo gabagaboobo dabayaaqada bishaan Soon, lana abaalmariyo kooxaha ku guuleysta kaalmaha hore.
C/laahi Qorshe
Warbaahinta Qaranka South Africa
