Waxaa maanta magaalada Muqdisho soo gaarey ardey tartamayaal ah oo ka kala socda Dowlad Goboleedyada xubnaha ka ah Dowladda Federaalka Soomaaliya oo ka qeyb galaya Tartanka Xifdinta Qur’ aanka Kariimka ee Bisha barakaysan Ramadaan oo berri si rasmi ah uga furmaya magaalada Muqdisho.
Tartanka Xifdinta Qur’aanka Kariimka ee bisha Ramadaan ayaa waxaa markii ugu horreysey sanadkan marti geliyey Madaxweynaha Jamhuuriyadda Federaalka Soomaaliya Mudane Xasan Sheekh Maxamuud, iyadoo ay ku tartamayaaan 24 ardey oo ka kala socota Dowlad Goboleedyada Jubbaland, Koonfur Galbeed, Hirshabeelle, Galmudug, Puntland iyo Maamulka Gobalka Benaadir,
Tartanka Xifdinta Qur’aanka Kariimka ee bisha Barakeysan ee Ramadaan oo socon doona muddo 4 maalmood ah, ayaa qeyb ka ah qorshayaal ay Wasaaradda Awqaafta iyo Arrimaha Diinta Xukuumadda Federaalka Soomaaliya ay ku dhiirra gelineyso ardeyda Soomaaliyeed ee ku guda jirta barashada iyo Xifdinta Qur’aanka Kariimka, waxaana abaal marino muhiim ah la guddoonsiin doonaa tartamayaasha gala kaalimaha 1-aad, 2-aad iyo 3-aad.
