Wariyaha Warbaahinta Qaranka ee Balcad ku sugan ayaa ku soo waramaya tirada dhimashada gaariga shacabka saarnaayeen ee ay maanta qaraxa la eegteen dhagar qabayaasha Al-Shabaab ay gaartay 21 qof, kadib markii afar qof oo dhaawac ka soo gaaray falka qaraxa ay ku nafwaayeen magaalooyinka Muqdisho iyo Jowhar oo dhaawac ahaan loogu qaaday.
Gaariga oo ahaa minibus ka baxay Muqdisho kuna sii jeeday magaalada Jowhar ayaa miino nuuca dhulka lagu aaso ah oo ay dhigeen argagixisada Al-Shabaab kula qaraxday inta u dhexeysa Jowhar iyo Balcad, waxaana goobta ku naf weysay 17 qof oo shacab ah, halka afar qof oo kale ay dhaawacyo ka soo gaareen sida uu Warbaahinta Qaranka u xaqiijiyay wadihii gaariga oo falka ka badbaaday, waxaana haatan lagu soo waramayaa in afarta qof ay u dhinteen dhaawicii ka soo gaaray qaraxa, taasi oo tirada guud ka dhigeysa 21 qof.
Waddada xiriirisa magaalooyinka Balcad iyo Jowhar ee Gobolka Shabeellaha Dhexe ayaa waxaa dhowr jeer oo hore ka dhacay qaraxyo lala beegsaday gawaari ay saarnayeen dad rayidka ah oo waddada ku safrayay, kuwaasi oo ay ka dambeeyeen argagixisada Al-Shabaab oo caadi ka dhigay xasuuqa Ummadda Soomaaliyeed.
