Wasiirka Arrimaha dibadda dowladda Uganda Mr. Abubakhar Jeje Odongo ayaa hadalkan ka sheegay kulan uu magaalada Kampala gaar ahaan xarunta Wasaaradda arrimaha dibadda ee Uganda kula qaatay ergayga gaarka ee Madaxweynaha ee urur goboleedka iskaashiga dhaqaalaha bariga Africa Dr. Cabdisalaan Hadliye Cumar.
Kulanka oo ay goobjoog ahaayeen diblomaasiyiinta Safaaradda Soomaaliya ee Uganda ayaa waxa uu ergayga gaarka ah ee urur goboleedka iskaashiga dhaqaalaha bariga Afrika Dr. Cabdisalaan warbixin ka siiyay Wasiirka Arrimaha dibadda dowladda Uganda heerka ay marayso ku biiritaanka Soomaaliya ee ururkan.
Ergeyga ayaa sidoo kale Wasiirka uga waramay heerka ay marayso codsiga xubinimada Soomaaliya ee EAC, isagoo uga warbixiyay shirkii guddiga farsamada ee lagu qabtay Muqdisho bishii janaayo 2023, kaasoo lagu eegayay u diyaarsanaanta Soomaaliya ee xubinimada ururkaas, shirkaas oo ay natiijo fiicani kasoo baxday.
Dr. Cabdisalaan Hadliye ayaa u sheegay Wasiirka Arrimaha Dibadda Uganda in Soomaaliya ay ka doonayso dalka Uganda taageero si loo meelmariyo xubinimo buuxda oo Soomaaliya ka hesho ururka (EAC).
Wasiirka Arrimaha Dibadda dalka Uganda oo kulanka ka hadlay ayaa u sheegay Ergayga gaarka ah ee Madaxweynaha Soomaaliya in dalka Uganda uu si buuxda u taageersan yahay kusoo biiridda Soomaaliya ee ururka EAC, waxa uuna cadeeyay in Soomaaliya horayba si ficil ah uga mid tahay ururka marka la fiiriyo ganacsiga iyo xiriirka dadwaynaha oo Soomaalidu saamayn weyn ku leedahay gobolka,
“Kusoo biiradda Soomaaliya ee ururkaan waxay faa’iido ugu jirtaa ururka laftiisa”. Ayuu yiri Wasiirka oo u balan qaaday Ergeyga gaarka ah in dalka Uganda taageeri doono mar walba dalabka kubiiritaanka Soomaaliya ee ururka EAC.
