Hay’adda Qaramada Midoobay u qaabilsan qaxootiga ee UNHCR ayaa sheegeysa in qaxooti badan oo ka soo cararaya dagaallada Yemen ka socda ay soo gaari doonaan waddamada Jabuuti iyo Soomaaliya.
“Waxaan qosheyneynaa inay yimaadaan shan kun oo qof inta uusan dagaalku sii xoogeysan, sidaa darted waa inaan dib u eegnaa tirada, aad ayay uga sii badan kartaa” ayuu yiri Frédéric Van Hamme, oo ka tirsan saraakiisha arrimaha dibadda u qaabilsan xafiiska UNHCR ee waddanka Jabuuti.
Dowladda Jabuuti ayaa sheegtay inay xero cusub u dhisayso dadka qaxootiga ah ee ka imaanaya waddanka Yemen. Sidoo kale maamulka Soomaalilanad ayaa magaalada Berbera ka dhisaya xero lagu marti galiyo laba ilaa iyo saddex kun oo qaxooti ah, kuwaas oo la filayo inay ka soo gudbaan gacanka cadmeed sida uu sheegay wasiirka dib u dejinta Soomaaliland Cali Saciid.
UNHCR ayaa sheegtay in dadka qaxootiga ah eek u sugan waddanka Yemen ay tiro ahaan gaarayaan 246,000 oo qof, kuwaas oo intooda badan ay yihiin ay yihiin Soomaali.
