Wariye u shaqeynayay Telefishinka Kalsan ayaa maqribkii lagu dilay qarax loogu xiray gaarigiisa, xilli uu ku sugnaa Degmada Wadajir ee Gobolka Benaadir.
Qaraxa oo ahaa miinada nuuca dhejiska ayaa qeybta hoose ee kursiga darawalka loogu xiray, kaddibna la qarxiyay.
Xoghayaha Ururka Qaranka Suxufiyiinta Soomaaliyeed ee NUSOJ Maxamed Ibraahim Macalimuu oo goordhaw la hadlay Radio Muqdisho ayaa u xaqiijiyay geerida Allaha u naxariistee Wariye Marxuum Maxamed Ibraahim Gaabow in lagu dilay qarax loogu xiray gaarigiisa.
“Innaa Lilaahi Waa Innaa Ilaahi Raaji cuun, waxaan aad iyo aad geeri naxdin u ah in weiye Soomaaliyeed oo lagu magacaabo Maxamed Ibraahim Gaabow oo ka mid ah wariyeyaasha ka howlgala magaalada Muqdisho in lagu dilay xiligii maqribka qarax gaari oo ka dhacay Degmada Wadajir, waxaana naloo sheegay in qaraxa loogu xiray gaarigiisa, isla markaana uu ku qarxay, marka wariyaha sidaas ayuu ku dhintay aad iyo aad ayaana uga xun nahay in wariye Soomaaliyeed oo wax bartay, oo aan aqaano, ee dadaalay kana baxay Jaamacadda Muqdisho, , isla markaana Jaamacadda Mekerere ee wadanka Uganda ku soo sameeyay Waxbarahada heerka labaad ee Jaamacadda, ahaana nin fir fircoon,waana cambaareyneynaa cid Allaale iyo ciddii ka dambeysay dilkaasi” ayuu yiri Maxamed Ibraahim Macalimuu
Xoghayaha Ururka Qaranka Suxufiyiinta Soomaaliyeed ee NUSOJ ayaa sheegay in falka uu ahaa mid u dhacay si ula kac ah oo lagu bartilmaameedsanayay wariyaha.
Ciidamada ammaanka ayaa gaaray goobta uu ka dhacay qaraxa oo aheyd kawaanka malayga degmada Wadajir.
Miinada nuuca Magnada ee qeybta hoose darawalka gaariga lagu dhejiyo ayaa ka mid noqotay aaladaha bartilmaameedka ee dadka lagu khaarijiyo, waxaana horay loogu dilay Wariyeyaal, mas’uuliyiin iyo dad kale.
