Wefdigii uu hoggaaminaayey Wasiirka Wasaaradda Ganacsiga iyo Warshadaha ee Xukuumadda Federaalka Soomaaliya Eng Cabdullaahi Cali Xasan oo maalmihii u dambeeyey socdaal shaqo ku joogay dalka Cummaan, ayaa gaaray wadanka Baxreyn, waxaana halkaas si weyn ugu soo dhaweeyey oo ay kulan laba geesood ah wada-qaateen dhiggiisa dalkaasi Wasiirka Ganacsiga, Warshadaha iyo Dalxiiska Mudane Zayed R. Al Zayani.
Labada Wasiir, waxay ka wada-hadleen siddii loo abuuri lahaa ganacsi toos ah oo u dhaxeeya Soomaaliya iyo Baxreyn, isla mar ahaantaana la isku furo suuqyada ganacsi ee labada dal oo la helo khad maraakiibeed iyo mid Duulimaadyo toosa ah. Waxa kale oo ay carabka ku dhufteen siddii Xoolaha, Kalluunka iyo Dallaga Beeraha Soomaaliya loo geen lahaa suuqyada dalka Baxreyn.
Wasiiradu, waxaa kale oo ay isla-garteen in la helo is-afgarad u dhaxeeya labada Wasaaradood oo la xiriirta Ganacsiga, Warshadaha iyo Iskaashiga Dhaqaalaha, isla markaana la sameeyo guddi farsamo oo labada dhinac ah kana shaqeeya sidii loo abuuri lahaa xiriir Ganacsi iyo weliba in la abuuro madal ay ku kulmaan Ganacsatada Soomaaliya iyo dhiggooda Baxreyn, sidoo kale la isku xiro Bangiyada Soomaaliya iyo kuwa Baxreyn si ay u fududaato hannaanka bixinta lacagaha badeecadaha, maadaama ay Baxreyn tahay goobta kulmisa Baananka Bariga Dhexe.
Inj. Cabdullaahi Cali Xasan iyo wafdigiisa, waxay intaas ka dib booqasho ku tageen Suuqa Saamiyada lagu kala iibsado ee dalka Baxreyn oo inta badan shirkadaha ku jiraa ay yihiin kuwo ay leedahay Xukuumaddu sidoo kale na waxay booqdeen qeybo ka mid ah Wasaaradda Ganacsiga, Warshadaha iyo Dalxiiska ee dalka Baxreyn, gaar ahaan Waaxda Diiwaan-gelinta Shirkadaha Maal-gashiga iyo Waaxda Xakameynta tayada badeecadaha iyo Agabka Ganacsi ee dalka Baxreyn. Waxa kale oo uu Wasiirku booqday shirkadda Tenmou oo ah shirkad Maal-gelin ku sameysa fikradaha Ganacsi ee cusub, gaar ahaantaan dhanka Tiknoolajiyadda Isgaadhsiinta, Dalxiiska iyo Duulimaadka.
Ugu dambeyntii, Wasiirka Wasaaradda Ganacsiga, Warshadaha iyo Dalxiiska ee dalka Baxreyn Mudane Zayed R. Al Zayani, ayaa qado sharaf u sameeyey dhiggiisa dalka Soomaaliya Inj. Cabdullaahi Cali Xasan iyo wafdiga uu hoggaaminaayey.
