Wafdi ka socday Midowga Yurub oo maanta gaaray magaalada Kismaayo ee xarunta Gobolka Jubada Hoose ayaa halkaasi kulan kula qaatay Madaxda Maamulka KMG ah ee Jubba.
Wafdiga oo uu hoggaaminayay Wakiilka Midowga Yurub u fadhiya Soomaaliya Danjire Michele Cervone d’Urso ayaa waxaa socdaalkiisa ku wehliyay safiirrada dowladaha Sweden, Britain iyo Italy u fadhiya dalka Soomaaliya iyo xubno ka socday urur-goboleedka IGAD, waxaana kulanka looga hadlay arrimo ay ka midyihiin dhamaystirka maamulka KMG ah ee Jubba, dardar gelinta howlgallada ka dhanka ah Al-Shabaab iyo midaynta ciidanka Qaranka Soomaaliya.
Hogaamiyaha maamulka KMG ah ee Jubba Axmed Maxamed Islaam “Axmed Madoobe” oo kulanka kaddib la hadlay Warbaahinta ayaa sheegay in wafdiga ay isku afgarteen sidii loo dhameystiri lahaa Maamulkiisa iyo xoojinta sidii deegaannada maamulkasi looga saari lahaa argagixisada Al-Shabaab, isagoo xusay in maamulkiisu uu hirgelin doono qodobadii kulanka looga hadlay.
Danjire Michele Cervone d’Urso oo isna dhankiisa la hadlay Warbaahinta ayaa uga mahadceliyay mas’uuliyiinta maamulka KMG ah ee Jubba sida ay iskula garteen waxyaabihii ay ka wada hadleen, waxaana uu xusay in Midowga Yurub uu xoojinayo taageerada uu siinayo dowladda Federaalka ah ee Soomaaliya.
