Wafdi ka socday Hay’adda Ifrah Foundation oo ay hoggaaminayo Ifraax Axmad, oo ah aas-aasisa iyo hal’abuurka Hay’addan isla markaana u doodda xuquuqada Haweenka ayaa waxaa xarunta Safaaradda Soomaaliya ee dalka Kenya si diirran ugu soo dhaweeyay Danjiraha Jamhuuriyada Federaalka Soomaaliya ee Dalka Kenya, Mudane Danjire Jabriil Ibrahim Cabdulle, iyo xubno ka tirsan diblomaasiyiinta Safaaradda.
Kulan ay la qaadatay Safiirka ayaa waxaa diiradda lagu saaray dadaallada lagu xoojinayo wacyigelinta iyo ka hortagga gudniinka fircooniga ee gabdhaha ee luuqaada Engilishka marka la soo gaabiyo loo yaqaano FGM, ilaalinta xuquuqda gabdhaha iyo sidii loo dhiirrigelin lahaa in bulshada laga dhaadhiciyo muhiimadda ay u leedahay in la joojiyo dhaqanka waxyeellada u leh gabdhaha.
Ifraax Axmed ayaa Danjire Jabriil la wadaagtay qorshaha “Fashion for Change”, oo ah hindise wacyigelin iyo u-doodis ah oo ay iska kaashanayaan Anti-FGM Board-Kenya, Ifrah Foundation iyo Wallace Global Fund.
Hindisahan ayaa adeegsanaya fanka iyo bandhigga si loo gaarsiiyo bulshada farriin ku saabsan karaamada, madax-bannaanida jirka iyo ilaalinta gabdhaha, iyadoo codka iyo waaya-aragnimada dadka ka badbaaday gudniinka lagu salaynayo ololaha.
Kulanka ayaa sidoo kale lagu gorfeeyay muhiimadda ay leedahay in la xoojiyo iskaashiga Soomaaliya iyo Kenya, gaar ahaan deegaanada xuduudaha iyo bulshooyinka wadaaga xiriirrada dhaqan iyo bulsho, maadaama dadaallada ka dhanka ah FGM ay u baahan yihiin iskaashi iyo isku-duwid ka gudubta xuduudaha.
Danjire Jabriil Ibrahim Cabdulle Danjiraha Soomaaliya ee dalka Kenya ayaa ku dhiirrigeliyay Ifrah Foundation inay sii waddo dadaallada ay ugu jirto ka hortagga gudniinka gabdhaha, isagoo xusay muhiimadda ay leedahay in la xoojiyo wacyigelinta bulshada, gaar ahaan deegaanada ay dhaqankan wali saameyntiisa ku badan tahay.
Danjiruhu wuxuu sidoo kale adkeeyay in Soomaaliya ay u baahan tahay dadaallo isku dhafan oo ay qeyb ka yihiin hay’adaha dowladda, ururrada bulshada rayidka ah, culimada, waalidiinta, dhalinyarada iyo hay’adaha caalamiga ah, si loo gaaro isbeddel waara oo bulshada dhexdeeda ah.
Ifrah Foundation ayaa oo ah hay’ad u doodda xuquuqda haweenka ayaa waxa ay xiriir dhow iyo wada shaqeyn ay la leedahay hay’adaha dowladda iyo ururrada bulshada, si loo dardar geliyo wacyigelinta iyo qabashada dood bulsho si loo beddelo fahamka iyo caadooyinka bulshada ee la xiriira gudniinka gabdhaha.
Ifraax ayaa inta ay ku sugantahay magaalada Nairobi waxa ay kulamo doceedyo la qaadatay Safiirada iyo Diblomaasiyiinta beesha caalamka ee fadhigoodu yahay magaalada Nairobi ee dalka Kenya, waxaana 30ka August ay halkan ku qaban rabtaa kulan wacyigelin ah oo la xiriira gudniinka gabdhaha
