Magaalada Dhuusamareeb ee Caasimadda Galmudug waxaa maanta laga daahfuray wajiga labaad ee mashruuca Saab ee xasilinta iyo horumarinta magaalooyinka, kaasi oo ka shaqeynaya horumarinta kaabayaasha sida waddooyinka, Tamarta, iyo Garoomada diyaaradaha, waxaana maalgelinaayo mashruucan Bangiga adduunka.
Munaasabada daahfurka waxa kasoo qeyb galay Senator Cabdixakiin, Wasiirka Wasaaradda maaliyada Galmudug Mudane Farxaan Cali Gaban, maayarka Caasimada iyo ku-xigeenka, xubno ka tirsan golayaasha Xukuumadda iyo Baarlamaanka, guddoomiyaha rugta ganacsiga, Agaasimaha guud ee Wasaaradda Howlaha guud iyo qeybaha kala duwan ee bulshada.
Magaalooyinka nasiibka u helay ka faa’iideysiga mashruucaan waxaa kamid ah Caasimadda Galmudug ee Dhuusamareeb.
Waxaa daahfurka mashruucan ugu horreyn ka hadley isku duwaha marshruuca Saab Cabduqaadir Faarax Diiriye oo sheegay inay diyaar u yihiin hormarinta Magaalooyinka sida Galmudug oo kale.
Gudoomiyaha Dhuusamareeb Mudane Macalin Cabdiraxmaan Geeda Qorow, ayaa sheegay in Dhuusamareeb diyaar u tahay ka faa’iideysiga Mashruucan.
Wasiirka maaliyada Mudane Farxaan Cali Gaban ayaa ugu dambeyn tilmaamey in fulinta mashruucan faa’iido badan ku kordhin doono kaabayaasha dhaqaalaha Caasimadda Galmudug, isla markaane hormarin ku sameyn doono adeegyada ugu Muhiimka u ah bulshada.
