Wakiilka gaarka ah ee Urur Goboleedka IGAD ee Soomaaliya Danjire Maxamed Cabdi Afeey oo shir jaraa’id ku qabtay Muqdisho ayaa kaga hadlay dhowr arrimood oo ay ugu horeyso mahadcelin uu u jeediyay shacabka iyo dowladda Federaalka ah ee Soomaaliya marti gelinta shirkii Wasiirada Arrimaha Dibadda ee Urur Goboleedka IGAD oo shalay lagu soo gabo gabeeyay Muqdisho.
Danjiraha ayaa tilmaamay in Soomaaliya ay shirkii shalay ku soo bandhigtay waxyaabo aad u muhiimsan, waxaana uu intaa ku daray in beesha caalamka ay aad ula dhacsantahay horumarka amni ee ay ku talaabsatay dowladda.
Wakiilka IGAD ee Soomaaliya ayaa hoosta ka xariiqay in ciidamada dowladda iyo kuwa AMISOM oo iskaashanaya ay ku guuleysteen xaqiijinta amniga caasimadda iyo gobollada kale ee ku teedsan, isagoo xusay in IGAD ay soo dhaweyneyso dadaalada dib u heshiisiineed ee u dhexeeya Dowladda Federaalka ah ee Soomaaliya iyo Maamulka Somaliland, iyadoo arrintaasi ay gacan ka geysanayaan dowladaha Jabuuti iyo Turkiga.
Danjire Maxamed Cabdi Afeey ayaa sheegay in qodobo muhiim ah ay ka soo baxeen shirkii Wasiirada Arrimaha dibadda ee IGAD, kuwaasi oo ay ka mid ahaayeen hirgelinta Nidaamka Federaalka ah oo ay dowladdu wax badan ka qabatay iyo hiigsiga cusub ee sanadka 2016-ka oo uu ku tilmaamay in ay iminka muuqaneyso ififaalo arrintaasi ku saabsan, ayna ku rajo weynyihiin in ay qorshayaashaasi hirgalaan.
Shirka jaraa’id ayaa imaanaya xilli shalay Muqdisho lagu soo gabo gabeeyay shirka 53aad ee Wasiirada Arrimaha dibadda ee Ururu Goboleedka IGAD, kaasi oo si nabadgelyo ah ku soo idlaaday, iyadoo ka qeyb galayaasha shirka ay dowlada ku amaaneen marti gelinta shir nuucaasi oo kale ah.
