Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii tobnaad ku tartamay tartameyaasha Degmooyinka Hodan VS Garbahaareey oo ka kala tirsan Gobollada Benaadir iyo Gedo, waxaana barnaamijka sanadkii afaraad oo xiriir ah taabagelineya Maamulka Gobolka Benaadir.
Tartameyaasha labada degmo ee Hodan VS Garbahaareey ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon, waxaana sida sharciga qabo marka labada degmo la weydiiyo min afar su’aal la guda galay isbarashada degmooyinka iyo waxyaabaha ay degmo kasta caan ku tahay oo maqal iyo muuqaalba leh.
Hodan
Tartameyaasha Degmada Hodan ee gobolka Benaadir waxaa la weydiiyey todobo Su’aal, waxaana ay si sax ah uga jawaabeen Hal su’aal, waxaana ay iska qaldeen lix su’aal, waxa ay si ka faa’iideysi ah u heleen hal su’aal oo soo hareer martay tartamyaasha degmada Garbahareey, hadaba wadarta guud ee dhibcaha tartameyaasha Degmada Hodan ay heleen waxay noqoneysaa afar (4) dhibcood.
Garbahaareey
Tartamayaasha Degmada Garbahaareey ee gobolka Gedo waxaa dhankooda la weydiiyay todobo su’aal, waxa ay ka jawaabeen labo su’aal, waxa ay iska qaldeen shan su’aal, mana jirin wax ka faa’iideysi ah oo ay heleen tartamayaasha degmada Garbahaareey, waxaana wadarta guud ee dhibcaha tartameyaasha degmada Garbahaareey ay noqotay afar (4) dhibcood.
Labada tartame waxa ay noqdeen isku dhibco, waxaana lagu daray su’aalo dheeri ah, si loo kala saaro tartamayaasha Degmooyinka Hodan iyo Garbahaareey, waxaana la weydiiyay min hal su’aal,.
Su’aasha koowaad oo la weydiiyay tartamayaasha Garbahaareey wey garan waayeen, mana jirin cid ka faa’iideysatay, balse tartamaayasha degmada Hodan ayaa waxa ay iska qaldeen su’aashii dhankooda la weydiiyay, halka ay ka faa’iideysteen tartamaayasha Degmada Garbahaareey.
Tartamayaasha Degmada Garbahaareey ee gobolka Gedo ayaa caawa u soo gudbay wareegga labaad ee tartanka.
Hadaba Habeen dambe oo ah habeenka kow iyo tobnaad ee tartan cilmiyeedka Warbaahinta Qaranka hadii uu Alle idmo Barnaamijka, waxaa ku tartami doona tartamayaasha Degmooyinka Garoowe Vs Heliwaa oo ka kala tirsan Gobollada Nugaal iyo Benaadir.
Sawir Qaade: Maxamed Macalin Xasan White-ka iyo Khadar Cali Nuur
