Kooxda Alshabaab oo ah koox ka been sheegtay Diinta Islaamka iskana dhaadhicisay in ay kaligood Muslim yihiin, Soomaalida kalana u haysata dad gaalo ah ama ka ridoobay Diinta Islaamka waxay dalka Soomaaliya lagu arkay markii ugu horaysay sagaashameeyadii.
Waqtigaas waxay ahaayeen in la tirin karo oo gacmaha lagu soo qabqaban karo, haddii loo dhaqaaqo, laakiin awoodooda xoogga leh waxay la soo baxeen, waagii Maxkamadaha 2006dii..
Markii la iska waraystay arintaas iyo cidda fulisay amarkaasna waxay si cad oo bareer ah u sheegteen kooxdaan in ay ka madax banaan yihiin Maxkamadihii Islaamiga ahaa, Maxaakiimtuna kama war hayn kooxdaan mayalka adag ee sida tooska ah uga amar qaadanaysay dad aan u dhalan dalka soomaaliya oo horay u soo gubay kuna soo caasiyey dalalkooda, dhuumaalaysi iyo gaboodna ka soo raadsaday dalkeena.
Gumad iyo xaalufin kasta oo ay dalka iyo dadka u gaysteen kooxdan qawlaysatada ah lama waayin weligeed dad kale oo soomaaliyeed oo rayid iyo ciidanba isugu jira oo ka horyimaada mabda’ooda dad laynta iyo boobka ah iskana celiya, inkasta oo guul laga gaaray baabi’inta kooxdaas dhiigyacabka ah ee inta badan ku gabada magaca diinta islaamka.
Waxaa xaqiiq ah in ay kooxdaani ay yaambo iyo katarabiil ay ka dhigteen dhalinyaro Soomaaliyeed oo aan wax la barin iyo dad waawayn oo maangaab ah iyo qaar kale oo nolosha lagu ciririyey waqtigii dagaalada sokeeye.
Hadda waxaa meelo ay ku dhuumaalaystaan oo dalka ka mid ah ka socda Beegsi qurux badan oo aan waxba lagu yeelaynin dadka weli ku hoos nool Alshabaab, taas oo lagu bartilmaan beegsanayo Amiirada iyo horjoogayaasha Kooxdaas, arintaas oo ay fulinayaan Cutubyo ciidamada Geesiyiinta ah ee soomaaliyeed iyo dalalka Saaxiibada la ah oo daqiiqad iyo saacad kasta lagu qaarjinayo xubno sar sare oo qawlaysatada Alshabaab ka tirsan.
Qaar laga soo qabtay iyo qaar kale oo iska soo dhiibay oo u waramay warbaahinta ayaa laga soo xigtay in lagu qalday Diinta islaamka oo aysan aqoon fara badan u lahayn, islamarkaana ay run moodeen, waxaaney intaasi raaciyeen in ay maanta ka shalaayayaan wixii ay Soomaalida kale u gaysteen.
Waxaa hubaal ah in laynta maanta lagu hayo Alshabaab iyo weerarada isdaba joogga ah oo ay ku hayaan ciidamada qaranka Soomaaliyeed uu noqon doonaa mid looga adkaado qawlaysatada Alshabaab, isla markaana ay mahadin doonaan soomaalida oo dhami.
Waxaa ninkan oo is soo dhiibay haatan uu gacanta ugu jiraa ciidamada Dowladda Soomaaliya ee Gobolka Gedo ku sugan,iyadoo tani ay qeyb ka tahay firxadka iyo qulqulka maleeshiyada iyo horjoogayaasha Shabaab oo si xowli ah isku soo dhiibaya Dowladda Soomaaliya.
Sababaha ugu badan ayaa ah khilaaf ka dhextaagan Al-shabaab dhexdooda,taasi oo horseeday in xitaa horjoogihii ugu sareeyey Alshabaab uu ka soo cararo halkii horay uu ugu dhuuman jiray waxuuna hadda ku dhuumanayaa Gobolka Gedo sida ay saraakiil ka tirsan sirdoonka Qaranku sheegeen.
Madaxweynaha Jamhuuriyadda Federaalka Soomaaliya Mudane Maxamed C/llaahi Farmaajo ayaa horay u sheegay in ay dhisyayaan Ciidan Qaran oo xoog badan kaasoo laga doonaya soo Afjiradda Kooxda alshabaab, isagoo shacabka soomaaliyeed ugu baaqay inay taageeraan Ciidamada Qaranka si ay u helaan Niyad wanaagsan oo ay ku dagaalamaan, waana tan maanta horseeday in Ciidanka Qaranka ay qaadaan Howlagaladan lagu tirtirayo Kooxdan Diin-laawayaasha ah.
Shacabka Soomaaliyeed ayaa aad u soo dhaweeyay Howlgaladan ka dhanka ah Kooxda Arxan laawayaasha Shabaab iyagoo sheegay in ay horseedeen Howgaladan kala cararka Kooxda iyo hoos u dhac ku yimid falalkii xumaa ay ku hayeen Deeganada ay ku dhuumaaleysanayaan.
Uga Dambeyn Khubarada Aqoonta u leh Kooxaha noocan oo kala ah ee Argagixisada iyo Shacabka Soomaaliyeed ayaa ku micneeyay Howl-galadan Ciidanka Xoogga Dalka oo kaa-shanaya saaxiibada Caalamka in ay hor seedayaan in Dalka laga Ciribtirro Kooxdan Argigixisada Alshabaab, taasoo micneheedu yahay dhamaadka alshabaab.
W/D:Tifaftiraha Guud ee Wakaaladda SONNA
