Wasiirka Amniga dowlad goboleedka Hirshabeele, mudane C/qaadir Aadan Jeelle, ayaa maanta waxaa uu warbixin ku aadan xaaladda amni ee deegaanada maamulka uu siiyay xubnaha Aqalka sare u qaabilsan Amniga iyo Arrimaha gudaha.
Warbixinta wasiirka ayaa waxaa uu kaga hadlay ka bixitaanka ciidanka AMISOM ee qaar kamid ah deegaanada gobolka Shabeelaha dhexe, gaar ahaan degmada Cadale, Raaga- ceele iyo goobo kale.
Wasiirka Amniga ayaa sheegay in bixitaanka AMISOM ee xilligan ay tahay mid culeys hor leh ku ah shacabka ku dhaqan deegaanadaas, isagoo xusay in arrintaas dib loo eego lagana fiirsado dhibaatada ka dhalan karta tallaabadaas.
Senator Cismaan Maxamed Macow, oo kamid ahaa xubnihii Aqalka sare ee maanta dhageystay warbixinta wasiirka Amniga ee Hirshabeele, ayaa xusay in ay arrinta kala hadli doonaan cida ay khuseyso isla markaana madaxda qaranka la wadaagi doonaan.
Ciidanka midowga Afrika ee AMISOM ayaa waxaa ay ka howlgalaan qeybo kamid ah maamulka Hirshabeele gaar ahaan gobolka Shabeelaha dhexe.
