Munaasabad lagu soo bandhigayay warbixin ay hay’adda horumarinta haweenka ee IIDA iyo ururka caalamiga ah ee u dooda xuquuqda dadka laga tirada badanyahay ee MRS international ay ka soo diyaariyeen haweenka la heyb sooco ee dalka Soomaaliya oo loogu magac daray LOOMA OOYAAN ayaa maanta lagu qabtay magaalada Nairobi.
Warbixintan ayaa ka sheekeeyneysay dhibaatada ay wajahaan haweenka laga tirada badanyahay ee ku nool dalka Soomaaliya.
Munaasabaddan ayaa waxaa ka soo qeyb galay xildhibaano ka tirsan baarlammaanka Soomaaliya,Safiirka dowlada Soomaaliya u fadhiya dalka Kenya Maxamed Cali Nuur (Ameriko),safiirka dowlada Soomaaliya u fadhiya xarunta hay’ada qaramada midoobay u qaabilsan xuquuqda aadanaha ee fadhigeedu yahay Geneva Yuusuf Maxamed Ismaaciil (Bari Bari),safiirka midowga yurub u qaabilsan Soomaaliya Michele Cervone d’Urso,wakiilo ka kala socday maamulada Puntland,iyo Soomaaliland,boqorka qoomiyadaha Gaboya ee bariga afrika Axmed Ugaas Iimaan iyo xubno ka kala socday ururada u doono xuquuqda haweenka ee ka jira dalka Soomaaliya.
Agaasimaha guud ee Hay’adda IIDA Maryan Yaasiin ayaa sheegtay in warbixinta ay ka soo uruuriyeen haweenka soomaaliyeed ee la heyb sooco ee ku nool guud ahaan dalka Soomaaliya.
Maryan ayaa intaasi ku dartay in loo baahanyahay in laga gudbo caadada xun is heyb sooca,iyadoo sheegtay in halku dhigga hay’adda IIDA ee Sanadkan uu yahay SINAAN IYO CADAALA.
Munaasabaddan ayaa waxaa sidoo kale hadalo ay ku soo dhaweynayeen warbixintan LOOMA OOYAAN ka jeediyay Safiirka dowlada Soomaaliya u fadhiya dalka Kenya Maxamed Cali Nuur (Ameriko),safiirka dowlada Soomaaliya u fadhiya xarunta hay’ada qaramada u qaabilsan xuquuqda aadanaha ee Geneva Yuusuf Maxamed Ismaaciil (Bari Bari),safiirka midowga yurub u qaabilsan Soomaaliya Michele Cervone d’Urso.
Ugu Dambeyntii Xildhibaanada kala ah Biibi Khaliif Jaamac iyo Maryan Aweys Jaamac ayaa sheegay in aysan jirin beelo la heyb sooco oo tirakoob lagu sameeyay,iyagoo ku baaqay in dadka Soomaaliyeed ay joojiyaan caadada xun ee is Heyb Sooco.
Sawir qaade:-C/raxmaan Cumar Cabdi (Somali)
