Farsamiyaqaan ka mid ah shaqaalaha Tvga Universal xarunta Magaalada Muqdisho ayaa ku dhawacmay qarax loogu xiray Gaarigiisa xilli uu ku sugnaa degmada xamarweyne ee Gobolka Banaadir.
Sakariye Maxamuud Timacadde oo ka mid ah Shaqaalaha Tvga Universal oo la hadlay Radio Muqdisho ayaa sheegay in dhaawaca Wariyahaan oo lagu magacaabo Cabdixamiid Maxamed “Karsaay” uu yahay mid culus isla markaana lagu daweynayo mid ka mid ah Xarumaha Caafimaadka Magaalada.
Agaasimaha Tv-ga Universal ee Soomaliya Cabdullaahi Xersi Kulmiye ayaa Radio Muqdisho u Sheegay in Wariye Cabdixamiid Karsaay xaaladdiisu ay hadda tahay mid daran Balse laga soo saaray qaybta Degdega ah ee Cusbitaalka islamarkaana ay socoto howl lagu Caawinayo Xaaladdiisa Caafimaad.
