Wasaaradda caafimaadka ee xukuumadda Soomaaliya ayaa sheegtay in ay sameysay diyaar garow ku aadan dhibaatooyinka caafimaadka ee ka dhalan kara roobabka xoogan ee la saadaaliyay in ay ka di’i doonaan Soomaaliya.
Wasiirka Caafimaadka Xukuumadda Federaalka Soomaaliya marwo Xaawo Xasan oo ka hadashay Fatahaadaha iyo Qataraha ay keeni karto “EL ÑINO” ee la saadaaliyay ayaa sheegtay in ka wasaarad ahaan ay diyaariyeen qorshayaasha fatahaadaasi haddii ay dhacaan ay kaga hortagayaan cudurada ka dilaaca.
Marka roobab iyo fatahaadaha ay dhacaan waxaa ka dhasha cuduro kale duwan oo u baahan in loo guntado sida in uu dilaaco Shuban biyood,kaneeco iyo cuduro kale duwan , waxaana wasaaradu ay xustay in ay diyaarisay dawooyinka loogu talo galay in lagu caawiyo dadka Soomaaliyeed ee degan wabiga jiinkiisa.
Wasaaradda Caafimaadka Xukuumadda Soomaaliya ayaa wada dadaalo ay ku horumarineyso xaruumaha caafimaadka ayna ku caawineyso waxyaabaha kale duwan ee muhiimka u ah xaruumahaasi.
