Wasaaradda amniga ee xukuumadda Federaalka Soomaaliya ayaa heegan buuxa gelisay ciidamada ammaanka, iyagoo dhinaca kalena howlgallo caawa ka wada degmooyinka gobolka Banaadir.
Afhayeenka wasaaradda amniga Maxamed Yuusuf Cismaan ayaa Radio Muqdisho u sheegay in heegan buuxa la geliyay ciidamada ammaanka, kadib markii sida uu sheegay ay heleen xog ku saabsan mintidiinta Shabaab oo qorsheynaya falal argagixiso oo ay ku fuliyaan Muqdisho.
Maxamed Yuusuf Cismaan Afhayeenka oo hadalkiisa sii wata ayaa intaasi ku daray in marka laga soo tago heeganka ay dhinaca kale ciidamadu howlgallo dheeraad ah oo lagu xaqiijinayo amniga ka wadaan dhamaan xaafadaha iyo isgoysyada magaalada Muqdisho.
Wuxuu tilmaamay in ciidamadu ay habeen iyo maalin u taagan yihiin ka hortagga falalka amnidarrada ah, isagoo hoosta ka xariiqay in ciidamadu ay maalmihii la soo dhaafay fashiliyeen qaraxyo lagu soo xiray baabuur iyo Mootooyin, kuwaasoo la doonayay in lagu qal qal geliyo amniga caasamadda.
