Wasiir ku-xigeenka Wasaaradda Beeraha iyo Daaqa ee dowlad gobaleedka Galmudug Cilmi Cali Cabdi oo ay wehliyeen duqa Degmada Gaalkacyo Cabdiraxmaan Sheekh Xasan Jimcaale Guddoomiyaha Gobalka iyo Xildhibaanno ka tirsan Baarlaanka Galmudug ayaa maanta si rasmi ah xariga uga jaray xafiiska Wasaaradda Beeraha Galmudug ee Gobalka Mudug.
Munaasabadda xarig jarka xafiiska oo ay ka qeyb galeen mas’uuliyiinta Wasaaradda ee heer gobal iyo heer Wasaaradeed, guddiga iskaashatooyinka Beeraleeyda Gobalka iyo mas’uuliyiinta Maamulka gobalka ayaa waxaa ugu horeyn ka hadlay Maayarka Degmada Gaalkacyo Sheekh Cabdiraxmaan Sheekh Xasan Jimcaale oo bogaadiyay hirgalinta xafiiskaan oo uu tilmaamay in uu wax weyn ka tari dooni horumarinta tabcashada iyo wax soo saarka gobalka.
Guddoomiyaha gobalka Mudug Cabdiraxmaan Cali Diiriye Isxal ayaa isna fariin guud u diray isku duwayaasha Wasaaradaha ee gobalka Mudug.
Guddoomiye ku-xigeenka Guddiga Beeraha ee Baarlamaanka Galmudug Xildhibaan Maxamed Xuseen Tahaliil ayaa dar daaran ku aadan garab siinta beeraleeyda u jediyay Wasaaradda Beeraha Galmudug iyo hay’addaha ka shaqeeya arrimaha wax soo saarka iyo beeraha.
Wasiir ku-xigeenka Wasaaradda Beeraha Cilmi Cali Cabdi ayaa dhankiisa shegay in hirgalinta xafiiskaan uu qeyb ka yahay xoojinta shaqada Wasaaraddu ay u heyso bulshadeeda.
