Wasaaradda Caafimaadka xukuumadda Soomaaliya ayaa ugu baaqday Hay’adaha ammaanka dowladda Soomaaliya in ay baaritaanno ku sameeyaan sababta keenta dabkii ka dhashay Cusbitaallada Banaadir iyo Madiina ee magaalada Muqdisho.
Wasiir ku xigeenka wasaaradda Caafimaadka Soomaaliya mudane Cusmaan Maxamed Cabdi (Cusmaan Daalo) ayaa ugu baaqay Hay’adaha amniga dowladda in ay baaritaan deg deg ah ku sameeyaan dabkii ka kacay cubitaallada Banaadir iyo Madiina oo adeeg caafimaad u sameyn jirey shacabka danta yar.
Wasiir ku xigeenka Caafimaadka Soomaaliya waxaa uu sheegay in khasaaraha ugu weyn uu soo gaaray Cusbitaalka Madiina oo dabku baabi’eyey qeybta saalada qaliinka oo ah qeybta ugu muhiimsan Cusbitaalka wasaaraduna ay xoogga saari doonto waxka qabashada iyo dayactirka qeybta saalada Cusbitaalka Madiina ee gubatay.
Wasiir ku xigeenka Wasaaradda Caafimaadka Soomaaliya Cusmaan Maxamed Cabdi (Cusmaan Daalo) waxaa kale oo uu sheegay in wasaaradda Caafimaadka Soomaaliya ay wado qiimeyn ku saabsan ogaanshaha inta uu la egyahay khasaaraha ka dhashay dabka Cusbitaaladaas.
Ugu dambeyn wasaaradda Caafimaadka Soomaaliya waxaa ay ugu baaqeysaa hay’adaha caawiya dowladda Soomaaliya in ay gacan ka geystaan waxka qabashada dhibaatooyinka dabku uu gaarsiiyey Cusbitaallada Madiina iyo Banaadir.
