Wasaaradda Caafimaadka iyo daryeelka Bulshada ee Soomaaliya oo kaashanaysa Hay’adda UNFPA ayaa Soomaaliya ka hirgelisay Xarumaha Caafimadka ee Guurguura, taas oo lagu xannaaneynayo Hooyada iyo Dhallaanka.
Wasiirka Wasaaradda Caafimaadka iyo daryeelka Bulshada Xukuumadda Federaalka Soomaaliya Dr. Cali Xaaji Aadam ayaa Hay’adda UNFPA kala wareegay Adeegga Caafimaad ee guurguura si waxbadan looga badalo bedqabka Hooyada iyo Dhallaanka, adeegan ayaa sahli doona helitaanka Daryeelka Caafimaad ee loogu talagalay Hooyada iyo Dhallaanka xilliga dhalmada iyo kadibba.
Munaasabda wareejinta qalabka adeega Caafimaadka guurguura waxaa sidoo kale goobjoog ka ahaa Madaxda ugu sareysa ee Hay’addaha UNFPA, UNICEF iyo Hay’addo kale oo ka tirsan Hay’addaha Qaramada Midoobay iyo Ururadda Caalamiga ah, kuwaas oo dhmaantood bogaadiyay hirgellinta habkan cusub ee xannaaneynta Hooyada iyo Dhallaanka.
Gawaaridan loogu talagaley hanaanka cusub ee Caafimaadka guurguura oo gaaraya ilaa Shan (5) Gaari ayaa waxbadan ka geysan doona yareytna xaaladaha dhimasho ee dhaca xilliga dhalmada ee Hooyada iyo wax ka qabashada xilliyada ay dhacaan tacadiyada iyo kufsiyada ka dhanka ah Haweenka Soomaaliyeed ,taasoo lagula tacaali doono dhibaatadda soo gaarta.
