Wasaaradda howlaha guud, dib-u-dhiska iyo guriyeynta Galmudug ayaa maanta baarlamaanka Galmudug horgesay hindise sharciyeedka nidaaminta iyo nakhshadeynta magaalooyinka, maamulka dhulka iyo horumarinta dhismooyinka Galmudug oo ah sharci muhiim ah.
Fadhiga baarlamaanka ayaa waxaa shir guddoominayey guddoomiyaha baarlamaanka Galmudug Dr Maxamed Nuur Gacal iyo labadiisa ku-xigeen waxa uuna xildhibaannada hor dhigay ajandaha kulanka iyadoona mudanayaashu ajandaha ansixiyeen.
Wasiiru dowlaha wasaaradda howlaha guud, dib-u-dhiska iyo guriyeynta Galmudug Mahad Xaydar ayaa sharcigan muhiimadiisa baarlamaanka ka hor aqriyey isagoona sheegay in sharcigaan waxbadan kabadali doonno nakhshadeynta magaalooyinka Galmudug
Wasiirka wasaaradda howlaha guud, dib-u-dhiska iyo guriyeynta Galmudug Axmed Dhiblaawe Xasir ayaa mudanayaasha baarlamaanka Galmudug ka codsaday inay sharcigaan u meel mariyaan si loogu howlgalo.
Baarlamaanka Galmudug ayaa waxaa horyaala sharciyo ay soo gudbiyeen wasaaradaha Galmudug, waxaana la meelmariyey qaar ka mid ah iyadoona kuwa kale aqrintoodu socoto.
