Shir looga hadlayo xiriirka maaliyadeed ee wasaaradda maaliyadda dowladda federaalka ee Soomaaliya iyo maamul goboleedyada dalka ayaa maanta ka furmay magaalada Nairobi ee dalka Kenya, iyadoo shirkaas ay hormuud ka tahay wasaaradda maaliyadda xukuumadda Soomaaliya.
Shirka oo socon doono muddo toddobaad ah ayaa waxaa ka qeybgalayo guddiyo ka kala socda wasaaradda maaliyadda Soomaaliya, maamullada Puntland, Jubbaland, Galmudug, Koonfur-galbeed iyo khuburro dhinaca maaliyadda ah.
Isku duwaha mashruuca dib u habeynta maaliyadda dalka, Farxaan Cali Maxamuud ayaa u sheegay warbaahinta in shirka uu ku saabsan yahay sidii ay dowladda iyo maamullada u wadaagi lahaayeen nidaam loo dhan yahay oo maaliyadeed, fulinta shuruucda canshuuraha, xisaabaha iyo maareynta deymaha.
Waxaa uu sheegay in gabagabada shirka uu qorshuhu yahay in lagu sameeyo guddi qaran oo ka shaqeyn doono nidaamka maaliyadeed ee dalka ee heer federaal.
Mashruuca dib u habeynta maaliyadda Soomaaliya oo ay ku baxeyso lacag gaareyso $200 oo milyan oo doolar ayaa waxaa taageerayo bankiga adduunka.
