Wasaaradda arrimaha dibadda iyo maalgeshiga ee Xukuumadda Soomaaliya Mudane Cabdisalaan Hadliye Cumar ayaa sharaxaad ka bixiyay qorshaha Wasaaraddu ugu talagashay xoojinta xiriirka ay Soomaaliya la leedahay dalalka caalamka, iyo sidii dib dalkooda loogu soo celin lahaa qaxootiga Soomaaliyeed ee ku xaniban dalka Yemen.
Wasiirka oo la hadlay Radio Muqdisho ayaa sheegay in ciidamada amniga ay ku guuleysteen in 90% ay gacanta ku dhigeen dalka, ayna xaqiijiyeen sugidda Nabadgelyada Caasimadda, taasna ay keentay in ay sii xoogeysato xiriirka ay Soomaaliya la leedahay beesha caalamka, isla markaana dowr safaaradood laga furay Muqdisho.
“Jaaliyadaha Soomaaliyeed meelkasta oo ay joogaan way ka qeyb qaataan horumarinta dalka, waxa ayna yihiin kuwa isku duuban oo u taagan inay xoojiyaan isku xirka bulshada Soomaaliyeed meelkasta oo ay joogaan, marka howshii ugu weyneyd way qabtaan” ayuu yiri Mudane Cabdisalaan Hadliye.
Wasiirka Arrimaha dibadda ee Soomaaliya Mudane Cabdisalaan Hadliye Cumar ayaa hoosta ka xariiqay in Soomaalida ku nool dalka Yemen ay qorsheyneyaan sidii dalka dib loogu soo celin lahaa, si aysan u saameyn dhibaatada ka taagan Yemen.
“Qaxooti badan oo Soomaaliyeed ayaa ku nool dalka Yemen, marka waxaan qorsheyneynaa in aan dib ugu soo celino gudaha dalka, si aysan saameyn ugu yeelan rabshadaha ka taagan dalka Yemen, tan kale arrintan waqti ayay qaadaneysaa, waxaana la kaashan doonaa dowladaha aan saaxiibka nahay” ayuu yiri Wasiirka Arrimaha dibadda ee Soomaaliya.
