Mas’uuliyiin ka tirsan Waasaradda Qorsheynta, Maalgashiga iyo Horumarinta Dhaqaalaha Xukuumadda Federaalka Soomaaliya oo uu hoggaaminayay Wasiir ku Xigeenka Wasaaradda, Mudane Maxamed Cabdulqaadir Cali, ayna ku wehlinaayeen Agaasimaha Maamulka iyo Maaliyadda, Mudane Siciid Maxamuud Axmed, Agaasimaha Kormeerka, Qiimeynta iyo Xalka Waara, Marwo Zahra Cabdi Maxamed, ayaa wadajir ugu kuurgallay howlaha ka socda xarunta Olalaha loogu gurmanayo dhaawacyadii Qarixii Zoobe2 ee ka dhacay 29-kii Octobar magaalada Muqdisho.
Ujeedadda kormeerka madaxda Wasaaradda Qorsheynta ayaa ahaa:-
1. Hannaanka ay ku socdaan ollolaha iyo howlaha gurmadka sidii ay Wasaaradu u xoojin leheed.
2. Isku-duwidda iyo arruurinta xogaha la xiriira xaaladaha bukaannada, dadkii geeriyooday, qasaaraha hanti ee dhacay iyo howlaha taakuleynta socda ee gurmadka oo ay doorkeeda Wasaaraddu hormuud ka noqoyso shaqalaha iyo madaxda.
3. Diyaarinta Qorshaha dib u soo kabashada qasaarihii uu geystay qarax iyo sida loo dhis lahaa kaabayaasha gurmadka deg deg ah.
Mas’uuliyiinta ka socday Wasaarada Qorsheynta waxaa xarunta ku soo dhaweeyeen Guddoomiyaha Hey’adda Maareynta Masiibooyinka, Mudane Maxamuud Macalim Cabdulle iyo Agaasimaha Guud ee Qorsheynta Gobolka Banaadir, Mudane Cabdulqaadir Muxuaydiin Dalxa, iyaga oo la wadaageen xogaha dadka waxyeeladu gaartay iyo xaaladaha ay hadda ku suganyihiin.
