Wasiirka wasaaradda warfaafinta dhaqanka iyo dalxiiska ee xukuumadda Soomaaliya Mudane Maxamed Cabdi Xayir “Maareeye” uu maanta ku tagay xaruntii wakaalada Filimada Soomaaliya oo ku taala degmada Xamar-weyne ee gobolka Banaadir ayaa waxaa ku wehliyay agaasimaha guud ee wasaaradda warfaafinta C/rasaq Cali Yuusuf (Bahlaawi).
Agaasimaha guud ee wasaarada warfaafinta Soomaaliya oo ugu horeyn goobta ka hadlay ayaa wasiirka faahfaahin ka siiyay sida ay u suuragashay in dhimahan muddo 20 sano kadib gacanta u soo gashay wasaaradda warfaafinta Soomaaliya.
C/rasaaq Cali Yuusuf agaasimaha guud ee wasaaradda warfaafinta ayaa mahadcelin u jeediyay dadkii dhismahan ku noolaa mudadii burburka isla markaana ogolaaday in ay ka guuraan markii madaxda wasaaradu ay ka codsadeen,isagoo sidoo kale u mahadceliyay ciidanka booliiska Soomaaliya oo arintaas gacan ka geystay.
Wasiirka warfaafinta,dhaqanka iyo dalxiiska dowladda Soomaaliya Mudane Maxamed Cabdi Xayir “Maareeye” ayaa sheegay in xaruntan laga dhigi doono machadka tababarka saxaafadda Soomaaliyeed isla markaana dhowaan dib loo dhisi doono.
Wasiir Maareeye ayaa sidoo kale tilmaamay in ay heshiis la galeen ganacsato Soomaaliyeed oo dib u dhis ku sameysay xaruntan si loogu faa’ideysto, isagoo tilmaamay in heshiisyo kale la saxiixdeen dowlado iyo hey’ado marka la furo machadka balan qaaday in ay ku qalabeyn doonaan casri ah.
Dhowaan ayaa laga saaray dadkii Soomaaliyeed oo deganaa dhismaha wakaalada Filimada Soomaaliyeed.
