Wasiirka Amniga Gudaha ee Xukuumadda Federalka Soomaaliya Mudane Maxamed Abuukar Islow Ducaale oo ay wehlinayeen Xildhibaano ka tirsan Baarlamanka Federalka iyo xubno kale ayaa maanta socdaalka dhulka ah ku tegey degmada Balcad ee Gobolka Shabellaha Dhexe.
Wafdiga Wasiirka Amniga ayaa waxaa soo dhoweeyay mas’uuliyiinta maamulka Degmada Balcad oo uu horkacayo Guddomiyaha Degmada Balcad Qaasim Cali Nuur ( Qaasim Furdug) waxana ay la kulmeen qeybaha kala duwan ee bulshada, iyagoo ka dhagaystay maamulka iyo shacabka baahiyaha gaarka ah ee ay qabaan, gaar ahan tan amniga.
“Waxaan indhaheena ku soo aragnay burburka xoogga leh ee haysta wadada u dhaxeysa Muqdisho iyo Balcad iyo dhibaatada shacabka ku haysata, waxaana rajeyneynaa in aan dhowaan dayactir lagu sameeyo.”ayuu yiri Xildhibaan Carabow.
Wasiirka Amniga ee Xukuumadda Federaalka ah ee Soomaaliya Mudane Maxamed Abuukar Islow Ducaale ayaa sheegay inuu socdo qorshe amniga lagu soo celinayo, isla markaana kaalinta ciidanka xoogga dalka Soomaaliya ay noqon doonto mid meesha looga saaro weerar kasta oo ka yimaada maleeshiyaadka Al-shabaab.
Wafdia Wasiirka Amniga ee Soomaaliya waxaa ka mid ah Xildhibaan Cabdulqaadir Carabow Ibraahim iyo Xildhibaan Aadan Cali Xasan kana mid ah Xildhibaanada kuwaasi oo sheegay in degmada Balcad ay u yimaadeen sidii ay ugu kuurgali lahaayeen xaalada amni iyo mida baahi ee shacabka degmadu qabaan.
Maxamed Amiin Yabarow
