Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalam Cabdi Cali (Dhaay), ayaa maanta kulan dhiirrigelin iyo dardaaran isugu jira la yeeshay ardayda Soomaaliyeed ee wax ka barata magaalada Changsha, gobolka Hunan ee dalka Shiinaha.
Kulankan ayaa ahaa mid miro-dhal ah, waxaana uu Wasiirku fursad u siiyey ardayda inay si furan ula wadaagaan waayo-aragnimadooda nololeed iyo waxbarasho, caqabadaha ay wajahaan, iyo himilooyinka ay ka leeyihiin mustaqbalkooda iyo doorka ay ka qaadan karaan dib-u-dhiska iyo horumarinta dalkooda hooyo. Wasiir Dhaay ayaa si gaar ah ugu bogaadiyey dadaalka iyo kartida ardayda Soomaaliyeed ee ku sugan dalka Shiinaha, isaga oo xusay inay yihiin safiiro matalaya Dalkooda, kuna leh door muhiim ah horumarka dalka.
Intii uu ku sugnaa magaalada Changsha, Wasiirku waxa uu booqday Akadeemiyadda Taariikhiga ah ee Yuelu, oo ah xarun aqooneed oo fac weyn leh, kana mid ah meelaha ugu caansan ee lagu kaydiyo taariikhda iyo aqoonta dalka Shiinaha, muddo ka badan kun sano. Sidoo kale, Wasiirku waxa uu kormeer ku tagay Machadka Daraasaadka Afrika ee Jaamacadda Hunan (Institute of African Studies), halkaas oo uu ku ammaanay dadaallada joogtada ah ee lagu xoojinayo xiriirka cilmiyeed, dhaqameed, iyo mid istiraatiijiyadeed ee u dhexeeya Afrika iyo Shiinaha.
Booqashada Wasiirka ee magaalada Changsha ayaa muujinaysa sida ay uga go’an tahay Dowladda Federaalka Soomaaliya garab istaagga ardayda Soomaaliyeed ee wax ku barta dibadda, iyo sidoo kale horumarinta xiriirka laba geesoodka ah ee Soomaaliya iyo Jamhuuriyadda Dadka Shiinaha.
