Wasiirka Arrimaha Dibadda iyo Dhiirri gelinta Maalgashiga Xukuumadda Soomaaliya Cabdisalan Cumar Hadliye iyo Wafdi uu hoggaaminayo ayaa la kulmay Jaaliyadda Soomaaliyeed ee dalka Kuwait iyagoo kala hadlay Arrimo ay ka mid yihiin hanaanka ay u shaqeeyaan shaqaalaha jaaliyadda iyo doorka ay ku leeyihiin wax u qabashada Soomaalida ku nool Waddankaas.
Danjiraha Safaaradda Soomaaliya ee dalka Kuwait Cabduqaadir Amniin ayaa warbixin ka siiyay Wafdiga Wasiirka xaaladda ay ku shaqeyso safaaradda isagoo sheegay in si dar-dar leh ay ku shaqeeyaan Howlwadeennada Safaaradda.
Dhanka kale Wasiir Cabdisalaan Hadliye Cumar ayaa la kulmay Guddiga Jaaliyadda Soomaaliyeed ee Kuwait oo uu warbixin kaga dhageystay Guddoomiyaha Jaaliyadda Soomaaliya ee Kuwait Mr.Axmed Maxamed Axmed (Khumeyni).
Ugu Dambeyntii Wasiirka iyo Wafdigiisa ayaa ka qeyb galay kulan ballaaran oo lagu weydiinayay Xaaladda wadanka halka uu marayo kaas oo ay soo qaban qaabiyeen Mas’uuliyiinta safaaradda Soomaaliya ee Kuwait.
Wasiirka Arrimaha Dibadda iyo Dhiirri gelinta Maalgashiga Xukuumadda Soomaaliya Mudane Cabdisalaan Hadliye iyo Wafdigiisa ayaa ka soo Amba baxay Waddanka Kuwait kaddib markii ay soo dhameysteen Howlihii shaqo ay u joogeen Waddankaas.
