Wasiirka Arrimaha Dibadda iyo Iskaashiga Caalamiga Danjire Axmed Macallin Fiqi oo maanta xafiiskiisa ku qaabilay wafdi Turki ah oo uu hoggaaminayay Wasiir kuxigeenka Arrimaha Dibadda Prof Burhanettin Duran ayaa kala hadlay sidii lagu xoojin lahaa xiriirka labo geesoodka, laguna kobcin karo iskaashi istiraatiijiyadeed oo ballaaran, wax wadaagga iyo nacfi is-dhaafsiga dhinac walba.
Wasiir ku-xigeen Duran ayaa salaan uu ka siday Wasiirka Arrimaha Dibadda Turkiga Hakan Fidan u gudbiyay Wasiir Axmed Fiqi, isaga oo ka hadlay horumarka laga gaaray Baaqii Ankara ee soo baxay 11 December, 2024.
Intii uu socday kulanka waxaa labada dhinac ay xuseen muhiimadda ay leedahay fulinta heshiisyada la kala saxiixday ee dhinac kasta leh, oo ay ku jiraan Gaashaandhigga, Maalgeshiga, Kalluumeysiga iyo kheyraadka dabiiciga ah, iyadoo la xoojinayo baahida loo qabo iskaashi sal adag oo taaba-gelinaya horumar waara, islamarkaana horseedaya kobac dhaqaale.
