Ka dib muddo todobaad ah oo wadatashi uu u socday xubno ka tirsan golaha wasiirrada dawladda Soomaaliya oo wasiirka arrimaha gudaha iyo Fderaalka mudane C/raxmaan Xuseen Odawaa uu hoggaaminayay, Gudiga farsamada, mas’uuliyiinta maamullada Ximan iyo Xeeb, Galmudug iyo Ahlusunna ayaa waxaa ka soo baxay go’aanno ku aaddan shirka maamul u sameeynta Mudug iyo Galgaduud.
Wasiirka arrimaha gudaha iyo Fderaalka mudane Cabdiraxmaan Maxamed Xuseen Odawaa oo maanta saxaafadda kula hadlay Cadaado ayaa sheegay in wadatashiydaas oo in muddo ah socday kadib ay ka soo baxeen qodobo ay ka mid yihiin in Ergada shirka la jaangooyo, kuwaas oo tiro ahaan noqonaya 350-Xubnood.
Wasiirka ayaa ugu baaqay bulshada Mudug iyo Galgaduud inay la shaqeeyaan guddiga farsamada, isagoo ballanqaaday in dawladda Soomaaliya ay kaabayso hirgalinta maamulka labadan gobol.
Wasiir Odawaa iyo wafdiga uu hogaaminayay ayaa galabta dib ugu laabtay magaalada Muqdisho kadib in muddo ah oo ay Cadaado ku sugnaayeen.
