Shirka Soo bandhigidda Istraatiijiyadda Horumarinta Beeraha Soomaaliya ee Shanta Sanno ee soo socota oo ay soo qaban qaabisay Wasaaradda Beeraha iyo Waraabka Soomaaliya ayaa diiarada lagu saaray Arrimaha hor-tabinta u leh wax soo saarka iyo horumarinta Beeraha waxaana ka qeyb galay Mas’uuliyiinta wasaaradda Beeraha, xubno ka socday Maamul Goboleedyada, qubaro ku xeel dheer arimaha beeraha iyo marti sharaf kale.
Diyaarinta Istaaraatiijiyadan oo muhiim u ah dalka ayaa socotay Lix bilood waxayna soo martay heerarka kala duwan sida uu warbaahinta u Sheegay Agaasimaha Qorsheynta iyo Siyaasada ee Wasaaradda Beeraha Maxamuud Yaasiin Cartan kaas oo ka qeybgalaayasha kulanka ka codsaday inay fikradahooda ku kordhiyaan Istaraatiijiyadan oo muhiimad weyn ugu fadhisa dalka gaar ahaan beeraleyda qeybahooda kala duwan.
Maareeyaha Hay’adda Isgaarsinta Qaranka Cabdullaahi Sheekh Cabdicasiis iyo Professor Xuseen Iimaan oo dhankooda ka ha hadlay madasha Ayaa soo jeediyay in xooga la saaro dhaqangelinta Istaraatiijiyadda Horumarinta Beeraha si ay gacan uga geysato kordhinta wax soo saarka dalka iyo ka shaqeynta Sugnaanta Cuntada.
Wasiirka Beeraha iyo Waraabka Soomaaliya Mudane Saciid Xuseen Ciid oo shirka furay ayaa sheegay inay muhiimadoodu tahay garab-istaagga Beeraleyda iyo sare u qaadida wax soo saarka dalka, Wasiir Ciid ayaa dhinaca kale xusay inay ka wasaarad ahaan ku howlanyihiin soo nooleynta xaruumihii keydka Cuntada ee uu dalku lahaa si looga gaashaanto abaaraha is daba jooga ah ee dalka kusoo noq noqda oo sameyn weyn ku yeaashay nolosha dad badan.
